Выстаўкі 2022 г.

100 рарытэтаў: ад гістарычных кнігазбораў да сучасных арт-кніг

Выстава прысвечана гісторыі фарміравання фонду Нацыянальнай бібліятэкі Беларусі і дэманструе найбольш значныя і каштоўныя ўзоры беларускай і сусветнай кніжнай спадчыны, назапашанай за 100 гадоў.

Фонд галоўнай бібліятэкі краіны на сённяшні дзень налічвае звыш 10 мільёнаў экзэмпляраў.

Экспазіцыя знаёміць наведвальнікаў з калекцыямі рукапісаў, інкунабул, палеатыпаў, старадрукаваных кніг XVI–XVIII стст., рэдкіх кніг XIX – пачатку XXI ст.

Выстава адлюстроўвае эвалюцыю кнігі і фондаў бібліятэкі.

"Бібліятэка Янкі Купалы": да 140-годдзя з дня нараджэння Янкі Купалы ў межах выставы "Песняры зямлі беларускай"

У экспазіцыі прадстаўлены частка ўласнага кнігазбору паэта, перададзеная бібліятэцы ў 1920-я гг.; захаваныя выданні, пазначаныя ўладальніцкім запісам “Ів. Луцэвіч”; кнігі, выдадзеныя ў Пачаеве, Вільні, Віцебску, Смаленску, Маскве і Санкт-Пецярбургу, а таксама рукапісы ўспамінаў вядомага бібліёграфа Дзяржаўнай бібліятэкі БССР імя У.І. Леніна Бібіла Юліі Іосіфаўны.

Шэсць стагоддзяў гісторыі медыцыны і фармацыі ў рарытэтах Нацыянальнай бібліятэкі Беларусі: да 100-годдзя ўтварэння РУП “Белфармацыя”

Развіццё ведаў аб медыцыне і фармацыі шырока адлюстравана на старонках малавядомых кніг і рэдкіх выданняў, якія захоўваюцца ў Нацыянальнай бібліятэцы. На выставе прадстаўлены кнігі з фонду бібліятэкі па наступных раздзелах: лекавыя расліны (фармакагнозія); медыцына; аптэчная справа; вучэнне аб леках (фармакалогія).

Кніжныя скарбы з манастырскага куфра

Упершыню для шырокай публікі прадстаўлена ўнікальная магчымасць убачыць па сутнасці фрагмент архіва старадаўняй друкарні – неразрэзаныя і незбрашураваныя аркушы XVII і XVIII стагоддзяў, падрыхтаваныя для далейшай працы пераплётчыкаў.

Разцовая гравюра: Лембіт Лыхмус і венская школа

На выставе прадстаўлены тонкія і дасканалыя графічныя працы сучасных мастакоў, выкананыя ў тэхніцы класічнай разцовай гравюры.

У Беларусі разцовай гравюрай займаліся Тамаш Макоўскі, Аляксандр і Лявонцій Тарасевічы, Максім Вашчанка і інш. Сёння ў гэтай вельмі складанай тэхніцы беларускія майстры амаль не працуюць.

Асновай для экспазіцыі сталі сучасныя мастацкія творы з прыватнай калекцыі бібліяфіла Алега Судлянкова, а таксама работы замежных мастакоў. Большасць з іх – экслібрысы.

Гадзіна мовы: да Міжнароднага дня роднай мовы (21 лютага)

У экспазіцыі ўпершыню прадстаўлены 7 мадэляў гадзіннікаў лімітаванай калекцыі “Мова”, выпушчаныя ў 2019–2022 гг. Апошнія рэлізы калекцыі прысвечаны народнаму паэту Беларусі Пімену Панчанку да 105-годдзя з дня яго нараджэння. За аснову дызайну Мінскі гадзіннікавы завод узяў першы зборнік вершаў паэта – “Упэўненасць” 1938 г., у якім усхваляюцца хараство і багацце роднай зямлі.

Арт-кніга “Ясон”

На выставе прадстаўлена ўнікальнае выданне, якое з’явілася ў выніку рэалізацыі сумеснага праекта беларускага мастака-графіка, члена Беларускага саюза мастакоў Фёдара Шурмялёва і грэчаскага паэта і калекцыянера Крыстаса Гіянакаса.

Кніга прысвечана старажытнагрэчаскаму міфу пра падарожжа Ясона і арганаўтаў за залатым руном.