21 лістапада 2006 года ў галерэйна-выставачным комплексе Нацыянальнай бібліятэкі Беларусі адбылося ўрачыстае адкрыццё І Міжнароднага фестывалю пейзажа, прысвечанага Віталю Цвірку. У фестывалі разам з беларускімі творцамі ўзялі ўдзел мастакі з розных краін - Расіі, Казахстана, Малдовы, Украіны, Літвы, Турцыі.
Віталь Канстанцінавіч Цвірка - народны мастак Беларусі (1963 г.), лаўрэат Дзяржаўнай прэміі БССР (1967 г.).
Беларускія краявіды, таленавіта напісаныя майстрам, вызначаюцца адметнай, вольнай і магутнай пластыкай. Яны напоўнены ўнутранай гармоніяй, цеплынёй і шчырасцю. Гэты слынны жывапісец аднолькава бліскуча валодаў тэхнікай малюнка, акварэлі, алейнага жывапісу, быў выдатным педагогам. Многія яго вучні сталі вядомымі мастакамі.
Фестываль пейзажа - даніна пашаны Віталю Цвірку, цудоўнаму майстру пэндзля. У экспазіцыю будуць уключаны некалькі твораў мастака. Але галоўная мэта фестывалю - раскрыць сённяшні стан пейзажа, яго месца ў творчасці сучасных жывапісцаў. Для адных удзельнікаў праекта пейзажны жывапіс з’яўляецца толькі часткай іх творчых намаганняў, для іншых - жанр пейзажа вызначальны.
У фестывалі побач з беларускімі творцамі прымуць удзел мастакі з 12 краін свету - Расіі, Літвы, Латвіі, Казахстана, Малдовы, Украіны, Арменіі, Сербіі, Турцыі, ЗША, Кубы. Мастакі прадставяць розныя школы, розную пластыку, рознае адчуванне колеру, выявяць шырокі спектр развіцця сучаснага пейзажнага жанру - ад акадэмічнага да дэкаратыўнага, умоўнага.
Адметная індывідуальная манера кожнага мастака, цікавыя кампазіцыйныя рашэнні, выразная пластыка і дасканалая тэхніка - гэта тое, што выяўляе мастацкі ўзровень выстаўкі і выклікае цікавасць у аматараў мастацтва і прафесіяналаў.
Будзем спадзявацца, што фестываль пейзажа раскрые новыя перспектывы гэтага жанру, яго вялікі патэнцыял, здольнасць пастаянна абнаўляцца, адкрываць магчымасці для пошуку і эксперыментаў.