У мерапрыемстве прынялі ўдзел намеснік міністра культуры В.К. Гедройц, дырэктар Нацыянальнай бібліятэкі Беларусі Р.С. Матульскі, дырэктар Мінскай абласной бібліятэкі імя А.С. Пушкіна, старшыня Беларускай бібліятэчнай асацыяцыі Н.С. Чуева, галоўны спецыяліст кіравання ўстаноў культуры і народнай творчасці Міністэрства культуры Рэспублікі Беларусь А.А. Гамеза, загадчык бібліятэкі-філіяла мястэчка Лясны Мінскага раёна М.І. Даміно.
Галоўнымі тэмамі прэс-канферэнцыі сталі дасягненні і планы Нацыянальнай бібліятэкі Беларусі як інфармацыйнага і сацыякультурнага цэнтра краіны, а таксама стан бібліятэчнай справы ў рэспубліцы. Удзельнікі прэс-канферэнцыі падрабязна распавялі прадстаўнікам вядучых СМІ аб развіцці бібліятэчнай справы ў Беларусі, яго патрэбах і перспектывах.
Падчас прэс-канферэнцыі дырэктар Нацыянальнай бібліятэкі Беларусі Р.С. Матульскі паведаміў аб гісторыі НББ. У сваім выступленні ён цёпла адазваўся аб папярэдніках і супрацоўніках, якія шмат зрабілі для станаўлення, пасляваеннага адраджэння і развіцця бібліятэкі. Адказваючы на пытанні журналістаў, Р.С. Матульскі адзначыў, што Нацыянальная бібліятэка Беларусі ў яе сучасным стане не засяроджваецца толькі на прадстаўленні інфармацыі карыстальнікам. Вядучая бібліятэка краіны цяпер выконвае адначасова тры функцыі - працуе як інфармацыйны, сацыякультурны і сацыяпалітычны цэнтр.
Бібліятэка валодае самым поўным і запатрабаваным у рэспубліцы фондам нацыянальных і замежных дакументаў, з'яўляецца цэнтрам дэпазітарнага захоўвання ААН, ЮНЕСКА, Савета Еўропы, АБСЕ. Нацыянальная бібліятэка Беларусі мае доступ больш чым да 100 базаў даных. Яе інфармацыйныя рэсурсы налічваюць звыш 8,4 млн. адзінак захоўвання на розных носьбітах, сярод якіх больш за 70 тыс. рэдкіх і старадрукаваных кніг і рукапісаў, каля 3 млн. перыядычных выданняў. Больш за 309 бібліятэк з 59 краін свету з'яўляюцца яе партнёрамі па міжнародным кнігаабмене.