15 верасня 2003 г. у Нацыянальнай бібліятэцы Беларусі адкрываецца выстаўка "Кніга Беларусі: повязь часоў".
Выстаўка прымеркавана да ІІІ Міжнародных Кнігазнаўчых чытанняў і прадстаўляе найбольш значныя навуковыя дасягненні беларускіх і замежных даследчыкаў па гісторыі беларускай кнігі і беларускіх кнігазбораў.
Архітэктоніка выстаўкі складаецца з наступных раздзелаў:
- Бібліяграфія кніжных помнікаў Беларусі.
- Беларуская кніга ў часе і прасторы.
- Беларуская рукапісная кніга.
- Спадчына Францыска Скарыны.
- Кніга беларускага Рэнесансу.
- Беларуская кніга XVIII - пачатку ХХ ст.
- Беларуская кніга сёння.
- Беларускія гістарычныя кнігазборы.
Раздзел "Беларуская кніга ў часе і прасторы" адкрывае багацце навукова-даследчай дзейнасці навукоўцаў розных краін, прысвечанае вывучэнню беларускай кнігі. Першае шырокамаштабнае даследаванне па гісторыі кніжнай культуры Беларусі - "Гісторыя беларускай (крыўскай) кнігі" належыць беларускаму гісторыку Вацлаву Ластоўскаму. На выставе прадстаўлены манаграфіі вядомых сучасных беларускіх даследчыкаў Г.Галенчанкі, І.Саверчанкі, Н.Бярозкінай, В.Шматава, М.Батвінніка, А.Пяткевіча, расійскіх - Ю.Лабынцава, Л.Шчавінскай, Я.Неміроўскага, польскіх - М.Підлыпчак-Майеровіч, М.Цубжыньскай-Леанарчык і шматлікіх інш. Нацыянальная бібліятэка Беларусі актыўна займаецца даследаваннем праблематыкі дакументальных помнікаў Беларусі і выдае навуковыя зборнікі. Штогадовыя зборнікі "Здабыткі" ўводзяць у навуковы ўжытак новыя факты і звесткі з гісторыі кнігі і кніжнай культуры Беларусі. Матэрыялы мінулых Міжнародных Кнігазнаўчых чытанняў уключаюць даследаванні беларускіх, польскіх і расійскіх кнігазнаўцаў.
Раздзел "Беларуская рукапісная кніга" прадстаўляюць даследаванні па гісторыі рукапіснай кнігі. Беларуская рукапісная кніга бярэ свой пачатак ад Х ст. і не знікла з вынаходніцтвам кнігадрукавання. На Беларусі ў асяроддзі старавераў рукапісная кніга стваралася і выкарыстоўвалася і ў ХХ ст. Даследаваннем беларускай рукапіснай кнігі займаюцца М.Нікалаеў, В.Шматаў, В.Несцяровіч, Л.Станкевіч, М.Тарэлка, А.Цітавец і іншыя даследчыкі.
Раздзел "Спадчына Францыска Скарыны" прадстаўляе скарыніяну - даследаванні, прысвечаныя жыццю і дзейнасці беларускага і ўсходнеславянскага першадрукара. Дэманструюцца кнігі скарыназнаўцаў: Г.Галенчанкі, У.Агіевіча, А.Яскевіч, В.Шматава, Я.Неміроўскага, Ю.Лабынцава, В.Тумаша, А.Каўкі, В.Шалькевіча і інш. У 2002 г. Нацыянальная бібліятэка Беларусі выдала анатаваны бібліяграфічны паказальнік "Францыск Скарына: Спадчына і пераемнікі", падрыхтаваны Г.Галенчанкам.
Раздзел "Кніга беларускага Рэнесансу" раскажа пра паслядоўнікаў Ф.Скарыны, лепшых прадстаўнікоў навукі і культуры эпохі Адраджэння, што звязалі свой лёс з кніжнай справай - Пятра Мсціслаўца, Сымона Буднага, Васіля Цяпінскага, Спірыдона Собаля, Сімяона Полацкага і інш. Даследчыкі Я.Неміроўскі, Г.Галенчанка, Ю.Лабынцаў, А.Мальдзіс, У.Мархель і іншыя ў навуковых публікацыях асвятляюць багатыя традыцыі кнігадрукавання Беларусі, шматгранную і складаную гісторыю беларускай кнігі Рэнесансу.
Раздзел " Беларуская кніга XVIII - пачатку ХХ ст." прадстаўляе даследаванні беларускіх кнігазнаўцаў Я.Умецкай, Л.Доўнар і інш.
У раздзеле "Сучасная беларуская кніга" прадстаўлены як навуковыя даследаванні па сучаснай беларускай кнізе, так і найлепшыя ўзоры сучаснай кнігавыдавецкай дзейнасці Беларусі.
Вывучэнне старых кнігазбораў, якія з'яўляюцца часткай культурнай спадчыны - вывучэнне гісторыі нашага народа. На жаль, на Беларусі сістэмна і мэтанакіравана гэтай праблемай дагэтуль не займаюцца. У раздзеле "Беларускія гістарычныя кнігазборы" прадстаўлены трэці выпуск зборніка "Здабыткі", які цалкам прысвечаны гісторыі асобных кнігазбораў. Шматлікія публікацыі пра кнігі розных бібліятэк, якія за сваё жыццё набылі непаўторныя рысы - адметныя пераплёты, экслібрысы і пячаткі, уладальніцкія і чытацкія паметы і запісы, адлюстроўваюць гісторыю самаго паасобніка, а таксама калекцыі, з якой ён паходзіць.
Выстаўка прызначана як для спецыялістаў: кнігазнаўцаў, бібліятэкараў, музейных і архіўных супрацоўнікаў, так і ўсіх, хто цікавіцца гісторыяй духоўнай культуры Беларусі.
