С 9 па 18 лютага 2005 г. у аддзеле беларускай літаратуры Нацыянальнай бібліятэкі Беларусі праходзіць выстаўка, прысвечаная 75-годдзю беларускага пісьменніка Валянціна Яфімавіча Тараса. У экспазіцыі прадстаўлены зборнікі лірыкі і прозы, творы ў перакладзе аўтара, падборка матэрыялаў з перыядычнага друку.
Творчасць таленавітага паэта, празаіка, публіцыста, перакладчыка В.Тараса вядома шырокаму колу чытачоў. Піша пісьменнік на рускай і беларускай мове.
Паэтычным дэбютам В.Тараса стала публікацыя вершаў у альманаху "Советская Отчизна" ў 1949 г. Сёння Валянцін Яфімавіч - аўтар 6 зборнікаў вершаў і 6 кніг прозы, сотні публіцыстычных артыкулаў. Яго пяру належыць шэраг мастацкіх перакладаў. На рускую мову перакладзены раман Габрыэля Гарсія Маркеса "Восень патрыярха" (1978, разам з Карласам Шэрманам), кнігі В.Быкава, С.Гаўрусёва, С.Грахоўскага, А.Лойкі, У.Корбана, У.Нядзведскага, вершы Э.Агняцвет, П.Броўкі, Р.Барадуліна, А.Вярцінскага, М.Танка і іншых. Лепшыя пераклады беларускай паэзіі ўвайшлі ў зборнік "Запах мёда" (1986). Для Беларускага тэатра імя Я.Купалы на беларускую мову пераклаў п’есу Я.Шварца "Дракон".
В.Тарас вядомы як сцэнарыст. Ён аўтар сцэнарыяў некалькіх мультыплікацыйных фільмаў, дакументальных фільмаў пра Рыгора Барадуліна, Пімена Панчанку, Максіма Багдановіча, фільма-маналога "Пасля перамогі". У 1974 г. на Беларускім тэлебачанні пастаўлена яго п’еса "Не патушы свечку".
Некаторыя вершы Валянціна Яфімавіча загучалі як песні. Частка з іх увайшла ў рэпертуар ансамбля "Песняры".
Творы В.Тараса перакладзены на асецінскую, польскую, украінскую, французскую, чэшскую мовы.
