Амаль забытае рамяство: у бібліятэцы пройдзе майстар-клас па набойцы

24 сакавіка а 16-й гадзіне ў рамках унікальнай выставы “Жывыя крыніцы” пройдзе майстар-клас майстра народнай творчасці Вольгі Хачковай па вырабе сурвэткі ў тэхніцы набойкі па тканіне.

Дыпламант розных фестываляў і конкурсаў, член Беларускага саюза майстроў народнай творчасці, кіраўнік народнай студыі дэкаратыўна-прыкладной творчасці “Бусляня” Нацыянальнага цэнтра мастацкай творчасці дзяцей і моладзі Міністэрства адукацыі Рэспублікі Беларусь Вольга Хачкова валодае шматлікімі тэхнікамі традыцыйнай і сучаснай дэкаратыўна-прыкладной творчасці: ткацтва паясоў, саломапляценне, аплікацыя саломкай, бісерапляценне. Але ж асноўнымі напрамкамі творчай дзейнасці для сябе абрала роспіс пісанак і набойку  па тканіне.

Набойка – адзін з самых старажытных відаў роспісу тканіны. Яе асаблівасць заключаецца ў тым, што малюнак на тканіне выконваецца пры дапамозе друку штампам. З набіваных тканін шылі жаночыя ўборы, сарафаны, хусткі, кашулі, рабілі фіранкі, абрусы, коўдры. На жаль, набоечную тканіну асабліва не захоўвалі, таму і ў музеях яе вельмі складана знайсці.

У сучасным свеце стварэнне тканін з роспісам – прэрагатыва прамысловай вытворчасці. Механічныя прылады спрасцілі гэты працэс, але ў той жа час пазбавілі яго душэўнасці, асаблівай дэталёвай прапрацоўкі і таго духу, што ёсць толькі ў рэчаў, якія вырабляюцца ўручную. Таму мы запрашаем вас на майстар-клас Вольгі Хачковай для стварэння сваёй эксклюзіўнай творчай работы, якая нікога не пакіне абыякавым.

• для дарослых – 6 рублёў;
• для навучэнцаў сярэдніх, сярэднеспецыяльных і вышэйшых устаноў – 3 рублі;
• сямейны квіток (2 дарослых з дзіцём да 16 гадоў) – 11 рублёў;
• сямейны квіток (2 дарослых з 2 дзецьмі да 16 гадоў) – 13 рублёў;
• шматдзетныя сем’і (пры прад'яўленні дакумента) – 13 рублёў.

• дзеці да 7 гадоў і выхаванцы дзіцячых дамоў, людзі з абмежаванымі магчымасцямі (пры прад’яўленні дакумента);
• суправаджаючыя груп школьнікаў, выхаванцаў устаноў адукацыі (1 чалавек на 10 дзяцей).

Час работы выстаўкі адпавядае рэжыму работы бібліятэкі.

Тэлефоны для даведак: (8 017) 293 28 81 (для СМІ), 293 27 50 (для даведак).