3 красавіка ўдзельнікі праекта “На хвалі часу, у плыні жыцця” Нацыянальнай бібліятэкі Беларусі ўзялі ўдзел у літаратурна-музычнай імпрэзе “Жыццё як радасць існавання”, прымеркаванай да 100-годдзя ўступлення пісьменніка Кузьмы Чорнага ў літаратурнае аб’яднанне “Маладняк”.
Мерапрыемства было арганізавана ў аграгарадку Цімкавічы Капыльскага раёна, дзе прайшлі дзіцячыя гады класіка беларускай прозы. Менавіта гэты маляўнічы край, яго цудоўныя людзі, іх характары і ўнікальная гаворка, іх жыццё ў кантэксце беларускіх гістарычных падзей адлюстраваны на старонках шматлікіх твораў пісьменніка.
Сустрэча прайшла ў Цімкавіцкай сярэдняй школе імя Кузьмы Чорнага і была прысвечана маладым гадам празаіка, перыяду яго творчага станаўлення, унікальнаму часу, калі юныя хлопцы і дзяўчаты з розных куточкаў Беларусі стварылі “Маладняк” – першае прафесійнае аб’яднанне пісьменнікаў і паэтаў Беларусі, 100-годдзе якога мы адсвяткавалі ў лістападзе 2023 года.
Стаўшы сябрам літаратурнага згуртавання, Кузьма Чорны пачаў актыўна друкавацца ў тагачасных беларускіх газетах і адразу заслужыў высокую адзнаку крытыкаў. Агульную карціну літаратурнага жыцця 1920-х гадоў прадставілі вучням арганізатары і вядучыя імпрэзы – загадчыца Літаратурнага музея Кузьмы Чорнага Людміла Ніжэвіч і загадчыца Цімкавіцкай сельскай бібліятэкі Вольга Радкевіч.
Працягнула сустрэчу выступленне галоўнага бібліёграфа інфармацыйна-аналітычнага аддзела Нацыянальнай бібліятэкі Беларусі Юліі Амосавай. Яна паведаміла школьнікам пра сапраўдныя кніжныя раратэты з фондаў “алмаза ведаў” – раннія выданні Кузьмы Чорнага-маладнякоўца, якім ужо амаль 100 гадоў: зборнікі “Апавяданні” (1925), “Срэбра жыцця” (1925), “Па дарозе” (1926) з серыі “Кніжніца «Маладняка»”. Вучні даведаліся, што творы іх земляка пачынаючы з 1940-х гадоў ставіліся на сцэне беларускіх тэатраў, а па матывах апавяданняў пісьменніка быў зняты фільм “Маё дзела цялячае” (1998), відэафрагмент якога прагледзелі падчас імпрэзы. Выступленне было пабудавана ў форме дыялога са старшакласнікамі. Вельмі прыемна, што цімкавіцкія школьнікі добра ведаюць факты з жыцця і творчасці земляка, пазнаюць іншых пісьменнікаў-маладнякоўцаў на фотаздымках. За правільныя адказы кожны атрымаў сувенір з Нацыянальнай бібліятэкі.
За апошні час бібліятэкі Мінскай вобласці актыўна далучыліся да літаратурна-краязнаўчага праекта “Пісьменнікі – ураджэнцы роднага краю”, у межах якога напрацягу 2023 года праходзіў абласны конкурс на стварэнне лепшага віртуальнага рэсурсу пра пісьменніка-земляка на сайтах бібліятэк. Кіраўніком праекта выступіла Мінская абласная бібліятэка імя А.С. Пушкіна. Пра віртуальныя музеі, прысвечаныя пісьменнікам-маладнякоўцам Кузьме Чорнаму, Язэпу Пушчы, Міколу Нікановічу і Паўлюку Трусу распавяла школьнікам загадчыца аддзела бібліятэказнаўства пушкінскай бібліятэкі Таццяна Лаўрык.
Напрыканцы літаратурна-музычнай імпрэзы выступіла загадчыца аддзела абслугоўвання і інфармацыі Капыльскай раённай цэнтральнай бібліятэкі імя А. Астрэйкі Ірына Пятровіч, якая раскрыла вучням цікавыя старонкі ранніх апавяданняў Кузьмы Чорнага, змешчаных у першым томе акадэмічнага збору твораў празаіка, падрыхтаваным супрацоўнікамі Інстытута літаратуразнаўства імя Янкі Купалы НАН Беларусі і выдавецтвам “Беларуская навука” ў 2023 годзе.
Цудоўным упрыгожаннем сустрэчы стала выступленне настаўніцы па класе цымбалаў Цімкавіцкай дзіцячай школы мастацтваў Веранікі Зянько. У яе выкананні прагучаў беларускі народны найгрыш, а напрыканцы імпрэзы госці з задавальненнем праслухалі задушэўны “Мой родны кут” Ігара Лучанка, які па-майстэрску сыграла цымбалістка. Да музычных выступленняў далучыўся і юны акардыяніст, вучань 6 класа Цімкавіцкай сярэдняй школы Вітаўт Чарняўскі, які выканаў мелодыю “Саўка ды Грышка”.
Літаратурна-музычная імпрэза “Жыццё як радасць існавання” сапраўды стала радасцю для яго ўдзельнікаў. Нацыянальная бібліятэка Беларусі дзякуе арганізатарам мерапрыемства за гасціннасць і душэўнасць, якія заўсёды пануюць на цудоўных цімкавіцкіх ініцыятывах!
Матэрыял пададзены Юліяй Амосавай, галоўным бібліёграфам інфармацыйна-аналітычнага аддзела.
Фота Таццяны Лаўрык і Капыльскай раённай цэнтральнай бібліятэкі імя А. Астрэйкі