Тэматычная выстава “Будучыня Зямлі: вывучэнне і захаванне біяразнастайнасці”, прысвечаная Міжнароднаму дню біялагічнай разнастайнасці, адкрыта з 5 мая па 5 чэрвеня ў аддзеле абслугоўвання афіцыйнымі дакументамі (пам. 207).
Галоўная задача гэтага Дня – звярнуць увагу грамадскасці на праблему беззваротнага знікнення на зямлі многіх прадстаўнікоў флоры і фаўны і яшчэ раз нагадаць усёй сусветнай супольнасці аб неабходнасці прыняцця тэрміновых і рашучых мер для захавання экасістэм і біяразнастайнасці на міжнародным, нацыянальным і мясцовым узроўнях.
Прапанаваная выстава налічвае каля 100 дакументаў на рускай, англійскай і нямецкай мовах. Гэта кнігі, брашуры, перыядычныя выданні, буклеты.
У іх разглядаюцца прычыны скарачэння біяразнастайнасці на Зямлі, раскрываюцца праблемы захавання і рацыянальнага выкарыстання сусветных экасістэм, дадзена ацэнка нацыянальным і міжнародным намаганням у вырашэнні глабальна значных экалагічных праблем.
Сярод прадстаўленых на выставе дакументаў – матэрыялы па міжнародным заканадаўстве ў сферы захавання біяразнастайнасці, даклады і агляды ААН і іншых міжнародных арганізацый, матэрыялы даследаванняў па вывучэнні і ахове біяразнастайнасці, нацыянальныя даклады і ацэнкі выніковасці экалагічнай дзейнасці ў Беларусі, літаратура, у якой шмат цікавай інфармацыі аб адносінах чалавека і прыроды, задачах у сферы захавання біяразнастайнасці знікаючых відаў флоры і фаўны.
Экспазіцыя ўключае наступныя тэматычныя раздзелы:
- Біяразнастайнасць – аснова жыцця на зямлі
- Ацэнка, маніторынг і стратэгіі захавання біяразнастайнасці
- Міжнароднае супрацоўніцтва ў галіне захавання біяразнастайнасці. Нарматыўна-прававыя дакументы па захаванні біяразнастайнасці і навакольнага асяроддзя
- Біялагічная разнастайнасць Рэспублікі Беларусь
- Вывучэнне, ахова і выкарыстанне біяразнастайнасці лясных экасістэм, раслін і жывёл. Захаванне біяразнастайнасці знікаючых відаў флоры і фаўны
Выстава будзе цікавая студэнтам і аспірантам экалагічных, біялагічных і геаграфічных спецыяльнасцей, спецыялістам у галіне прыродакарыстання і аховы навакольнага асяроддзя, навуковым работнікам, а таксама ўсім, хто цікавіцца праблемай захавання біялагічнай разнастайнасці нашай планеты.
Міжнародны дзень біялагічнай разнастайнасці быў абвешчаны Генеральнай асамблеяй ААН 20 снежня 2000 года (рэзалюцыя № A/RES/55/201) і штогод адзначаецца 22 мая ‒ у дзень прыняцця ўзгодненага тэксту Канвенцыі аб біялагічнай разнастайнасці.
У верасні 2015 года дзяржавы – члены ААН прынялі новы Парадак дня ў галіне ўстойлівага развіцця на перыяд да 2030 года. У яго склад уваходзяць 17 галоўных мэт устойлівага развіцця (МУР). Задачы спынення працэсу страты біяразнастайнасці і садзейнічання рацыянальнаму выкарыстанню экасістэм былі ўключаны ў Мэту 15.
Праблема захавання біялагічнай разнастайнасці займае важнае месца ў экалагічнай палітыцы Рэспублікі Беларусь. Наша дзяржава ўсведамляе важнасць аб’яднання міжнародных намаганняў у вырашэнні глабальна значных экалагічных праблем свету. Беларусь ратыфікавала Канвенцыю аб біялагічнай разнастайнасці ў чэрвені 1993 года. Перспектыўныя прыярытэтныя напрамкі па выкананні канвенцыі былі вызначаны ў “Нацыянальнай стратэгіі і Плане дзеянняў па захаванні і ўстойлівым выкарыстанні біялагічнай разнастайнасці Рэспублікі Беларусь”. Міністэрствам прыродных рэсурсаў і аховы навакольнага асяроддзя і іншымі зацікаўленымі дзяржаўнымі органамі пастаянна вядзецца работа па вызначаных нацыянальнай стратэгіяй напрамках.
Карысныя спасылкі
- Праект Глабальнай рамачнай праграмы ў галіне біяразнастайнасці на перыяд пасля 2020 года
- Дзесяцігоддзе біяразнастайнасці (2011–2020)
- Гісторыя Канвенцыі
- Стратэгічны план
- Дзень біяразнастайнасці
- Мэты ў галіне ўстойлівага развіцця
- Саміт ААН па біяразнастайнасці (30 верасня 2020 г.)
- Дзесяцігоддзе ААН па аднаўленні экасістэм (2021–2030)
Міжнародныя дні па тэме
- Міжнародны дзень гор
- Міжнародны дзень лясоў
- Сусветны дзень дзікай прыроды
- Міжнародны дзень Маці-Зямлі
- Сусветны дзень акіянаў
- Сусветны дзень навакольнага асяроддзя
Асноўныя дакументы
- Канвенцыя аб біялагічнай разнастайнасці
- Дэкларацыі па навакольным асяроддзі
- Канвенцыі і пагадненні па навакольным асяроддзі
- Нагойскі пратакол рэгулявання доступу да генетычных рэсурсаў і сумеснага выкарыстання на справядлівай і роўнай аснове выгад ад іх прымянення да Канвенцыі біялагічнай разнастайнасці (2010)
- Прынцыпы лесаводства (1992)
- Базельская канвенцыя аб кантролі за трансгранічнай перавозкай небяспечных адходаў і іх знішчэннем (1989)
- Бонская канвенцыя па захаванні мігруючых відаў дзікіх жывёл (1979)
- Канвенцыя аб трансгранічным забруджванні паветра на вялікія адлегласці (1979)
- Канвенцыя аб міжнародным гандлі відамі дзікай флоры і фаўны, якія знаходзяцца пад пагрозай знікнення (1973)
- Рэзалюцыя аб абвяшчэнні Дня
Час работы выставы адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 27 34.
Матэрыял пададзены аддзелам абслугоўвання афіцыйнымі дакументамі.