З 12 чэрвеня па 24 ліпеня ў зале нотных і аўдыявізуальных дакументаў (пам. 305) праходзіць юбілейная выстаўка “Фантастычная сіла музыкі”, прысвечаная 200-годдзю з дня нараджэння Шарля Франсуа Гуно (1818–1893).
Адзін з найбуйнейшых французскіх кампазітараў другой паловы ХIХ стагоддзя ўвайшоў у гісторыю музычнага тэатра як стваральнік жанру лірычнай оперы, класічным узорам якой стаў яго “Фаўст”. “Немагчыма адмаўляць, – пісаў Чайкоўскі, – што «Фаўст» напісаны калі не геніяльна, то з незвычайным майстэрствам і не без значнай самабытнасці”.
Сярод работ Шарля Гуно вядомы оперы “Сафо”, “Скрываўленая манашка”, камічныя оперы “Філемон і Баўкіда”, “Галубка”, “Царыца Саўская”. Значнае мастацкае дасягненне Гуно – опера “Рамэа і Джульета”. Яе прэм’ера адбылася ў 1867 г. і азнаменавалася вялікім поспехам – на працягу двух гадоў адбылося 90 спектакляў.
У апошнія гады жыцця кампазітар адышоў ад опернай творчасці, засяродзіўшы ўвагу пераважна на жанры араторыі (“Выкупленне”, “Смерць і жыццё”) і музычна-крытычнай дзейнасці. Экспазіцыя знаёміць з кнігай Ш. Гуно “Воспоминания артиста”, на старонках якой раскрыліся найбольш яркія рысы асобы музыканта: бездакорны мастацкі густ, жывы і ясны розум, гумар, незалежнасць і арыгінальнасць меркаванняў аб сучасніках, шэдэўрах музыкі і жывапісу.
Гуно дасягнуў значных поспехаў і ў галіне педагогікі. Яго вучнямі былі Бізэ, Дэліб, Сен-Санс і Маснэ.
На выстаўцы прадстаўлены нотныя выданні твораў кампазітара, сярод якіх оперы “Лекар паняволі”, “Мірэй”, араторыя “Галія”, духоўная музыка, рамансы і песні для голасу з фартэпіяна, дуэты, а таксама аўдыязапісы твораў Ш. Гуно ў выкананні лепшых вакалістаў і дырыжораў свету – І. Архіпавай, М. Кабалье, П. Дамінга, Ц. Руфа, Б. Хайкіна і інш.
Дапаўняюць экспазіцыю кнігі і артыкулы пра жыццё і творчасць майстра.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра бібліятэкі.
Тэлефон для даведак: (8 017) 293 27 52.
