З 1 сакавіка па 30 красавіка ў зале перыядычных выданняў (пам. 106) арганізавана тэматычная выстаўка “Пазнай Беларусь! Вандроўкі ў гісторыю”.
Экспазіцыю склалі публікацыі, аўтары якіх на старонках газет і часопісаў прапаноўваюць чытачам займальныя падарожжы і экскурсіі па родным краі.
Шматлікія артыкулы, прадстаўленыя на выстаўцы, знаёмяць наведвальнікаў з замкамі Беларусі, гісторыя якіх звязана з гісторыяй Еўропы; з музеямі, што расказваюць пра жыццё і творчасць вядомых дзеячаў культуры Я. Коласа, Я. Купалы, А. Міцкевіча, М. Шагала, І. Рэпіна і іншых; з мемарыяльнымі комплексамі і помнікамі, якія ўвекавечылі падзеі Вялікай Айчыннай вайны, і інш.
Гісторыкі, працуючы з дакументамі, адкрываюць усё новыя і новыя старонкі нашай мінуўшчыны, знаходзяць невядомыя факты, пацвярджаюць ужо вядомыя.
Аб раней невядомых гістарычных падзеях XVIII–XX стст. паведамляецца ў матэрыялах газеты “Культура”, у рубрыцы “Гістарыёграф”.
У газеце “Літаратура і мастацтва” публікуюцца навіны архівазнаўства, а таксама даецца агляд займальных кніжных навінак па гісторыі. З артыкулаў такіх выданняў, як “Беларускі час”, “Минский курьер”, “Вечерний Минск”, наведвальнікі выстаўкі даведаюцца пра новыя адкрыцці ў археалогіі і архітэктуры мінулых стагоддзяў.
Падрабязнае знаёмства з найбольш значнымі асобамі, якія пакінулі след у гісторыі нашай Радзімы, – Усяславам Чарадзеем, Давыдам Гарадзенскім і інш., стане магчымым дзякуючы рубрыцы “Гісторыя Айчыны”, якую вядзе часопіс “Армия”.
Усяго экспазіцыя налічвае больш за 40 перыядычных выданняў, у ліку якіх часопісы “Беларуская думка”, “Беларусь”, “Беларускі гістарычны часопіс” і іншымі.
Кантактны тэлефон: 293-25-87.
 |
 |
 |
 |
 |
 |
