2 чэрвеня ў бібліятэцы адкрылася фотавыстава “Смак жыцця”, прымеркаваная да 25-годдзя з дня заснавання РНПЦ дзіцячай анкалогіі, гематалогіі і імуналогіі.
“Смак жыцця” – экспазіцыя аб прыгажосці чалавека, які праходзіць курс хіміятэрапіі, жыцці насуперак няпростым абставінам хваробы і лячэння, магчымасцях, пераадоленні, сіле, барацьбе...
13 фотагісторый пацыентаў РНПЦ дзіцячай анкалогіі, гематалогіі і імуналогіі распавядаюць аб прыняцці сябе, сваёй знешнасці, якая змянілася ў ходзе хіміятэрапіі, аб пераадоленні цяжкасцей лячэння. Мастацкія фотапартрэты знаёмяць нас з іх героямі, намаляванымі то нібы на вокладцы моднага глянцавага часопіса, то ў стылі фэнтэзі, авангардным, этна, рэтра, анімэ, касмічным і інш. Яркі крэатыўны макіяж, разнастайнасць элементаў дэкору, фларыстычныя кампазіцыі паказваюць жыццё вакол хіміятэрапіі ў непрадказальным і нечаканым ключы. Фатаграфіі адлюстроўваюць індывідуальнасць герояў, непаўторныя рысы, характар, унутраны свет.
Фотасесіі – своеасаблівая форма арт-тэрапіі для людзей, якія перажываюць празмерна складаны вопыт, здольных адчуваць смак да жыцця, радавацца, спадзявацца і любіць... У працэсе фотаздымак у дзяцей з’яўляецца магчымасць павысіць самаацэнку, знайсці ў сабе рэсурсы да далейшага лячэння, адаптацыі пасля анкалогіі.
Удзельнікамі-стваральнікамі выступілі фатографы, візажысты, стылісты, фларысты, а таксама кіраўнікі фотастудый.
У адкрыцці фотавыставы ўзялі ўдзел намеснік генеральнага дырэктара Нацыянальнай бібліятэкі Беларусі Віктар Пшыбытка, старшыня праўлення сацыяльна-дабрачыннага грамадскага аб’яднання “Разам” Маргарыта Міткевіч, дырэктар РНПЦ дзіцячай анкалогіі, гематалогіі і імуналогіі Анжаліка Сонцава, псіхолаг РНПЦ дзіцячай анкалогіі, гематалогіі і імуналогіі Наталля Шымко, аўтар і ідэйны натхняльнік праекта “Смак жыцця” Вераніка Супрун.
Мэта выставы – змяніць стэрэатыпы грамадства адносна анкахворых, стварыць пазітыўны вобраз без няёмкасці, з павагай да прыгажосці, сілы і індывідуальнасці кожнага з іх.
Наведванне экспазіцыі ўваходзіць у кошт наведвання агляднай пляцоўкі.
Рэжым работы выставы адпавядае рэжыму работы агляднай пляцоўкі.
Наведаць выставу можна ў галерэі “Панарама” (22-гі паверх) да 24 лістапада 2022 г.
Дата заканчэння працы экспазіцыі можа быць зменена.
Тэлефон для даведак: (8 017) 368 37 37.
Матэрыял пададзены аддзелам сувязей з грамадскасцю.
