14 ліпеня ў Нацыянальнай бібліятэцы адбылося адкрыццё выстаўкі сучаснага беларускага мастака Андрэя Карпянкова “Прастора колераў”.
У экспазіцыі прадстаўлены серыі абстракцый у жывапіснай тэхніцы дрыпінгу, створаныя аўтарам на працягу апошніх пяці гадоў. Дамінуючы вобраз у работах – кветкі, якія сімвалізуюць хараство прыроды, эмоцыі чалавека, імкненне падзяліцца радасцю і цеплынёй. Побач з букетамі – палотны з выявамі квітнеючага сада, вобраз якога нясе ідэю надзеі, аднаўлення і няспыннага жыццёвага кола. Вобраз дрэва, выкананы ў розных каляровых інтэрпрэтацыях, адсылае да філасофскага пераасэнсавання пытанняў пра час, рост, крохкасць і моц жыцця, яго зменлівасць і пастаянства. Мірыяды рознакаляровых кропляў ствараюць эфект сатканых з паветра і колераў кветкавых сюжэтаў, рассыпаных на палотнах мастака выяў і кампазіцый.
У сваіх творах Андрэй Карпянкоў дэманструе пачуцці, і для гэтага звяртаецца да мовы экспрэсіянізму – пошукаў формы і жывапіснай тэхнікі, невыпадковых плям, фактур і ліній. Яны дапамагаюць дастаткова абстрактнай мовай напісаць своеасаблівы эмацыйны дзённік.
На адкрыцці мерапрыемства з прывітальным словам выступіў намеснік генеральнага дырэктара Нацыянальнай бібліятэкі Беларусі Віктар Пшыбытка. Сваім экспертным меркаваннем аб прадстаўленых работах падзяліліся дырэктар Мінскага мастацкага вучылішча імя А.К. Глебава Аляксандр Шантаровіч і намеснік старшыні па арганізацыйных і творчых пытаннях Беларускага саюза мастакоў Андрэй Басалыга.
Мастак, выкладчык спецыяльных дысцыплін Мінскага дзяржаўнага мастацкага каледжа імя А.К. Глебава, сябра Беларускага саюза мастакоў Андрэй Карпянкоў падзякаваў Нацыянальнай бібліятэцы за магчымасць выставіць свае работы, выказаў шчырую ўдзячнасць прысутным за пажаданне натхнення ў творчасці, а таксама прэзентаваў свае творы, 11 з якіх былі напісаны адмыслова для экспазіцыі. Карціны раскрываюць прачытанне мастаком канцэпцыі “прастора колеру”.
Выстаўка будзе працаваць да 5 верасня 2022 года.
Дата заканчэння працы экспазіцыі можа быць зменена.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 368 37 37.
Глядзіце таксама рэпартаж аб адкрыцці выстаўкі тэлеканала "Беларусь 1".
