28 кастрычніка ў галерэі “Атрыум” Нацыянальнай бібліятэкі Беларусі адкрыецца выстаўка мастацкага тэкстылю “Чароўныя фарбы Індыі”.
Выстаўка знаёміць з каларытам, унікальнай культурай і яркімі традыцыямі, філасофіяй і міфалогіяй Індыі, дазваляе акунуцца ў яе гістарычнае мінулае, сутыкнуцца з адметнасцю лада жыцця індыйцаў. У экспазіцыі прадстаўлены мастацкі тэкстыль, старадаўнія і сучасныя дываны, тканыя пано, шаўковыя шалі, традыцыйныя сары, вырабы дэкаратыўна-прыкладнога мастацтва з дрэва і бавоўны, роспіс скруткаў на тканевай аснове, вышыўка “залатымі” ніткамі, прадметы ўжытку і інш.
Экспанаты прадстаўлены Індыйскім саветам па культурных сувязях (ICCR). Праект накіраваны на распаўсюджванне і папулярызацыю індыйскай культурнай спадчыны сярод беларусаў. Беларусь і Індыя плённа супрацоўнічаюць у эканамічнай, гандлёвай, вытворчай, культурнай, навуковай сферах.
Выстаўка “Чароўныя фарбы Індыі” дзейнічае ў Мінску ўпершыню. Арганізатарамі выступілі Нацыянальная бібліятэка Беларусі і Пасольства Рэспублікі Індыя ў Рэспубліцы Беларусь.
Выстаўка будзе працаваць да 21 лістапада.
Дата заканчэння працы экспазіцыі можа быць зменена.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 368 37 37.
Глядзіце рэпартажы тэлеканалаў "Беларусь 1" і "Беларусь 24".
Матэрыял пададзены аддзелам сувязей з грамадскасцю.
