25 лістапада ў бібліятэцы адбылося ўрачыстае адкрыццё выстаўкі “Movement” і чарговай пляцоўкі I Трыенале “Канцэпт”.
“Movement” дэманструе рух беларускага выяўленчага мастацтва і спрыяе адраджэнню, развіццю і папулярызацыі яго лепшых традыцый і дасягненняў. У экспазіцыі – работы вядомых і маладых беларускіх аўтараў з Мінска і рэгіёнаў Беларусі, якія актыўна працуюць сёння ў кірунку канцэптуальнага мастацтва, і авангардны жывапіс 1980-х – пачатку 1990-х гадоў з калекцыі Беларускага саюза мастакоў.
Генеральны дырэктар Нацыянальнай бібліятэкі Беларусі Аксана Кніжнікава павітала прысутных, распавяла аб асноўнай ідэі арт-фестывалю I Трыенале “Канцэпт” і выказала надзею, што наведвальнікі атрымаюць задавальненне як ад сузірання твораў мастацтва, так і ад падрыхтаванай бібліятэкай кніжнай экспазіцыі, прысвечанай беларускаму авангарду.
Першы намеснік старшыні Беларускага саюза мастакоў, мастацтвазнаўца Наталля Шаранговіч падкрэсліла пра асаблівасць прадстаўленага праекта: “Мы ўпершыню збіраем частку калекцыі твораў Беларускага саюза мастакоў канца 1980-х – пачатку 1990-х гадоў. Сярод жывапісных прац ёсць класікі беларускага авангарду – Мікалай Селяшчук, Ізраіль Басаў, Людміла Русава. Экспазіцыя будзе мець цікавасць у гледачоў і культурнай грамадскасці Мінска: яна дазваляе паглядзець, як распачыналася беларускае авангарднае мастацтва і як яно паўплывала на сённяшнія дызайн-праекты мастакоў”.
Намеснік старшыні Беларускага саюза мастакоў па творчай рабоце, мастак-графік Андрэй Басалыга адзначыў, што гісторыя беларускага авангарду налічвае больш за 100 гадоў: “Для мастацтва 100 год – адзін дзень. За гэты час моцна змяніўся светапогляд творцаў, таму сучасным гледачам трэба быць гатовымі да глыбокіх уражанняў аб мастацтве новага ўзроўню”.
Мастацтвазнаўца, арт-крытык, арт-дырэктар аўтарскай некамерцыйнай канцэптуальнай галерэі “Брама”, член Беларускага саюза мастакоў і Беларускага саюза дызайнераў Ларыса Фінкельштэйн падзякавала сучасным мастакам і арганізатарам праектаў і арт-фестываляў канцэптуальнага мастацтва, падтрымала думку папярэдняга выступоўцы: беларускае мастацтва будзе жыць яшчэ шмат стагоддзяў і тысячагоддзяў.
“Movement” дэманструе рух беларускага выяўленчага мастацтва і спрыяе адраджэнню, развіццю і папулярызацыі яго лепшых традыцый і дасягненняў. У экспазіцыі – работы вядомых і маладых беларускіх аўтараў з Мінска і рэгіёнаў Беларусі, якія актыўна працуюць сёння ў накірунку канцэптульнага мастацтва, і авангардны жывапіс 1980-х – пачатку 1990-х гадоў з калекцыі Беларускага саюза мастакоў.
На выстаўцы можна будзе ўбачыць эксперыменты з колерам, святлом, гульню з сэнсамі і зместамі, якія здзівяць гледачоў у жывапісе, графіцы, фота і дызайн-праектах сучасных аўтараў. Творы класікаў беларускага авангарду энергетычна ёміста дэманструюць індывідуальны, суб’ектыўны погляд на мастацкія задачы, сціраючы грані паміж партрэтам, пейзажам, нацюрмортам і кампазіцыяй.
Арганізатары выстаўкі “Movement” – Нацыянальная бібліятэка Беларусі і Беларускі саюз мастакоў.
Выстаўка будзе дэманстравацца ў галерэях “Атрыум” да 3 лютага і “Лабірынт” да 13 лютага 2022 г.
Дата яе заканчэння можа быць зменена. Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 368 37 37.
Матэрыял пададзены аддзелам сувязей з грамадскасцю.
