13 снежня ў галерэі “Ракурс” (2-гі паверх) адбылося адкрыццё выстаўкі “Зімовая”, прымеркаванай да навагодніх свят.
У экспазіцыі – жывапіс і графіка сучасных беларускіх мастакоў, работы якіх аб’яднаны агульнай тэмай – святочнай пераднавагодняй зімой. У розных тэхніках аўтары-ўдзельнікі, сябры Беларускага саюза мастакоў, прадстаўнікі секцый “Верасень”, “Традыцыя”, “Жывапіс”, “Графіка”, адлюстравалі сваё бачанне адметнай пары года – казачнай, напоўненай марамі, надзеямі і ўсмешкамі.
Генеральны дырэктар Нацыянальнай бібліятэкі Беларусі Аксана Кніжнікава; першы намеснік старшыні Беларускага саюза мастакоў, мастацтвазнаўца Наталля Шаранговіч; мастак, член Беларускага саюза мастакоў, заслужаны дзеяч мастацтваў Рэспублікі Беларусь Васіль Касцючэнка; мастацтвазнаўца, арт-крытык, мастак-графік, старшыня секцыі Беларускага саюза мастакоў “Верасень” Марына Эрэнбург павіншавалі гасцей вернісажу з надыходзячымі святамі і выказалі шчырае пажаданне прысутным адчуць праз работы мастакоў усю прыгажосць марознай пары года.
“Зімовая” выстаўка дэманструе гледачам разнастайную панараму пераднавагодніх вобразаў, калейдаскоп святочных пажаданняў, традыцый, успамінаў і асацыяцый. Аматары калядных гулянняў і цудаў, усе, хто загадвае ў навагоднюю ноч жаданні, змогуць памроіць і зарадзіцца выдатным настроем.
Экспазіцыя адкрыта да 23 лютага 2023 года.
Дата заканчэння яе працы можа быць зменена.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 368 37 37.
Матэрыял пададзены аддзелам сувязей з грамадскасцю.