27 мая ў Нацыянальнай бібліятэцы Беларусі адбылося адкрыццё VI Форуму бібліятэкараў Беларусі “Гуманітарна-асветніцкая дзейнасць бібліятэк у кантэксце агульначалавечых каштоўнасцей і беларускай дзяржаўнасці”.
Арганізатарамі мерапрыемства выступаюць Міністэрства культуры Рэспублікі Беларусь, Беларуская бібліятэчная асацыяцыя, Нацыянальная бібліятэка Беларусі.
На ўрачыстым адкрыцці ў адрас удзельнікаў форуму прагучалі прывітанні ад міністра культуры Рэспублікі Беларусь Анатолія Маркевіча, генеральнага дырэктара Нацыянальнай бібліятэкі Беларусі Рамана Матульскага, прэзідэнта Расійскай бібліятэчнай асацыяцыі Міхаіла Афанасьева, прэзідэнта Украінскай бібліятэчнай асацыяцыі Аксаны Бруй.
У форуме прымаюць удзел кіраўнікі і спецыялісты бібліятэк розных сістэм і ведамстваў Рэспублікі Беларусь, прадстаўнікі навуковых і навучальных устаноў, органаў выканаўчай улады, грамадскіх аб’яднанняў і арганізацый.
На пленарным пасяджэнні ўдзельнікі абмяркоўвалі пытанні рэалізацыі дзяржаўнай палітыкі ў галіне бібліятэчнай справы, навукова-метадычнага забеспячэння дзейнасці бібліятэк, развіцця вышэйшай бібліятэчна-інфармацыйнай адукацыі ў кантэксце сучасных выклікаў і інш.
У межах мерапрыемства прайшла справаздачна-выбарчая канферэнцыя Беларускай бібліятэчнай асацыяцыі, на якой быў абраны новы склад кіруючых і рабочых органаў прафесійнага грамадскага аб’яднання. Новым старшынёй Савета ББА стаў дырэктар Фундаментальнай бібліятэкі Беларускага дзяржаўнага ўніверсітэта Уладзімір Кулажанка.
Прыемным момантам мерапрыемства стала ўзнагароджанне нашых калег ганаровымі граматамі за вялікі асабісты ўклад у станаўленне і развіццё Беларускай бібліятэчнай асацыяцыі. Апладысменты гучалі для дацэнта Інстытута павышэння кваліфікацыі і перападрыхтоўкі кадраў Беларускага дзяржаўнага ўніверсітэта культуры і мастацтваў Наталлі Бярозкінай, галоўнага рэдактара часопіса “Бібліятэчны свет” Людмілы Кірухінай, вядучага бібліёграфа Навуковай бібліятэкі Беларускага нацыянальнага тэхнічнага ўніверсітэта Уладзіміра Лазарава, адказнага сакратара часопіса “Бібліятэка прапануе” Лідзіі Макаранкі, ганаровага старшыні Беларускай бібліятэчнай асацыяцыі Уладзіміра Сарокі, дырэктара Рэспубліканскай навукова-тэхнічнай бібліятэкі Раісы Сухарукавай.
Ад усёй душы віншуем Уладзіміра Кулажанку і дарагіх калег! Прыміце пажаданні поспехаў і новых дасягненняў у прафесійнай дзейнасці!
Музычны падарунак – праграму “Замежныя хіты XX стагоддзя” – удзельнікі форуму атрымалі ад заслужанага калектыву Рэспублікі Беларусь – музычнай капэлы “SONORUS” Мінскай вобласці.
28 мая форум падоўжыць сваю работу ў межах секцыйных пасяджэнняў і майстар-класаў.
Матэрыял пададзены аддзелам сувязей з грамадскасцю.
Чытайце таксама: VI Форум бібліятэкараў Беларусі: другі дзень працы
