23 верасня ў Нацыянальнай бібліятэцы Беларусі адбылася экскурсія з наведваннем фондасховішча для пераможцаў фотаконкурсу "#♥_nlb" у сацыяльнай сетцы Instagram, праведзенага бібліятэкай напярэдадні свайго 100-годдзя.
Падчас экскурсіі госці не толькі пазнаёміліся з гісторыяй установы, архітэктурнымі асаблівасцямі будынка, сістэмай чытальных залаў, даведаліся аб шматстайным фондзе галоўнай бібліятэкі краіны, але і замовілі часопіс пра моду, прасачылі яго дастаўку да чытача. Упершыню экскурсанты змаглі трапіць у “самае сэрца алмаза” − фондасховішча, дзе ўбачылі як сучасныя выданні, так і выданні, якія выйшлі задоўга да заснавання Нацыянальнай бібліятэкі Беларусі.
Загадчыца аддзела захоўвання спецыялізаваных фондаў Юлія Твердахлебава азнаёміла пераможцаў конкурсу з часопісамі, якія пачалі выдавацца ў другой палове XIX стагоддзя і выходзяць да гэтага часу. Напрыклад, экскурсанты параўналі нумары часопіса “Вокруг света” за 1861 год і апошні нумар – за верасень 2022 года. Юлія Барысаўна таксама паказала экскурсантам фонды газет, нотных выданняў, аўдыявізуальных і электронных дакументаў. Уразіла разнастайнасць фонду выяўленчых дакументаў: збор паштовак XIX – пачатку ХХ стагоддзя з відамі беларускіх гарадоў, плакаты перыяду Вялікай Айчыннай вайны, працы беларускіх мастакоў-графікаў, рэпрадукцыі карцін замежных, рускіх і савецкіх мастакоў і многае іншае. Зацікавілі нашых гасцей нотныя рукапісы беларускіх кампазітараў і выданні з аўтографамі.
Напрыканцы экскурсіі пераможцы конкурсу падняліся на аглядную пляцоўку, каб зрабіць памятныя фота восеньскага горада з вышыні 73-х метраў!
Дзякуем удзельнікам за пазітыўны настрой і запрашаем усіх жадаючых на экскурсіі ў Нацыянальную бібліятэку Беларусі.
Матэрыял пададзены аддзелам экскурсійна-метадычнай работы.