Работнікі Нацыянальнай бібліятэкі наведалі Прэзідэнцкую бібліятэку Рэспублікі Беларусь.
Экскурсія дазволіла даведацца больш аб дзейнасці ўстановы, каштоўнасцях, якія захоўваюцца ў бібліятэчных фондах, пачуць цікавыя факты з гісторыі Дома ўрада, дзе знаходзіцца бібліятэка.
Падчас экскурсіі супрацоўнікі азнаёміліся з чытальнай залай, аддзеламі, у тым ліку старадрукаваных і рэдкіх выданняў, убачылі самыя цікавыя і рарытэтныя экзэмпляры з фондаў Прэзідэнцкай бібліятэкі Рэспублікі Беларусь: кнігі з розных калекцый, у тым ліку мініяцюрныя выданні і сучасныя кнігі з дароўнымі надпісамі, дакументы і перыядычныя выданні, якія адлюстроўваюць змены ў дзяржаве, грамадстве і культуры з XV па XX стагоддзе.
Праслухалі лекцыю, прысвечаную гісторыі Дома ўрада. Прэзентацыя “Жыццё і творчасць Іосіфа Лангбарда” раскрыла цікавыя факты аб творчым і жыццёвым шляху архітэктара.
У якасці абмену вопытам атрымалі вычарпальную інфармацыю датычна выкарыстання інфармацыйна-камунікацыйных тэхналогій у бібліятэчна-бібліяграфічных працэсах, даведаліся аб мастацкіх і тэматычных выставах і электронных праектах Прэзідэнцкай бібліятэкі.
Па завяршэнні экскурсіі кожны жадаючы атрымаў чытацкі білет і стаў карыстальнікам Прэзідэнцкай бібліятэкі Рэспублікі Беларусь.
Экскурсія падарыла калектыву незабыўныя ўражанні і станоўчыя эмоцыі.
Матэрыял пададзены прафсаюзным камітэтам.