20 жніўня ў рамках рабочага візіту бібліятэку наведаў Надзвычайны і Паўнамоцны Пасол Румыніі ў Рэспубліцы Беларусь Віарэл Мошану.
Падчас сустрэчы адбылася цырымонія перадачы калекцыі кніг, у якую ўвайшлі зборнік класіка румынскай паэзіі Міхая Эмінэску ў перакладзе на беларускую мову, кнігі пра творчасць вядомага румынскага скульптара Канстанціна Брынкуша, выдадзеныя Цэнтрам па даследаванні і папулярызацыі яго творчасці, нотныя сшыткі румынскага кампазітара Джорджэ Энеску, творы класічных і сучасных аўтараў, якія выйшлі на замежных мовах у выдавецтве Румынскага інстытута культуры, альбомы з рэпрадукцыямі работ румынскіх мастакоў і слоўнікі.
Дырэктар Нацыянальнай бібліятэкі Беларусі Раман Матульскі з удзячнасцю прыняў каштоўны падарунак, адзначыўшы, што перададзеныя ў дар кнігі зоймуць годнае месца ў фондах бібліятэкі.