25 красавіка ў галерэі “Лабірынт” адбылася заключная ў сезоне 2023–2024 гг. інтэрактыўная лекцыя-канцэрт з цыкла “Музычная спадчына Беларусі ў прасторы сучаснай культуры”.
Удзельнікі музычнай капэлы Цэнтра даследаванняў беларускай культуры, мовы і літаратуры НАН Беларусі выканалі праграму, якая паслужыла своеасаблівым вынікам першага сезона цыкла знаёмства з беларускім харавым музычным мастацтвам.
У выкананні струннага квартэта, салістаў-вакалістаў мужчынскага і жаночага вакальных ансамбляў, а таксама ўсяго калектыву, пад кіраваннем Жанны Філіповіч, прагучалі ўпадабаныя слухачам музычныя ўзоры з “Анталогіі нацыянальнай спадчыны”, якія ўжо выконваліся ў папярэдніх праграмах.
Не абышлося і без сюрпрызу – творы, прадстаўленыя калектывам у якасці анонсу праграмы “Музычны мемарыял Вялікай Айчыннай вайне ў творчасці сучасных беларускіх кампазітараў”, прымеркаванай да 80-годдзя вызвалення Беларусі ад нямецка-фашысцкіх захопнікаў, выклікалі асаблівую цікавасць і кранальны водгук у публікі.
Гледачы былі поўныя падзякі і водгукаў артыстам за цёплы вечар!
Пасля летняга перапынку супрацоўніцтва з музычнай капэлай будзе працягвацца. Чакаем вас 26 верасня на наступным канцэрце-лекцыі “Радуйся, Дево благословенная”, дзе будуць прадстаўлены традыцыйныя тэксты ў музыцы сучасных беларускіх кампазітараў.
Тэлефон для даведак: (8 017) 293 27 52.
Матэрыял пададзены аддзелам абслугоўвання спецыялізаванымі фондамі.
