У 1992 годзе Генеральная Асамблея ААН абвясціла 3 снежня Міжнародным днём інвалідаў.
У Беларусі указам Прэзідэнта гэты дзень аб’яўлены Днём інвалідаў Рэспублікі Беларусь.
У гэты дзень не будзе залішнім нагадаць усім пра тое, што сярод нас жывуць людзі, якія заслугоўваюць не толькі спачування, але перш за ўсё дапамогі, забеспячэння іх правоў на годнае жыццё, працу, адпачынак. Зараз у Беларусі пражывае 511,5 тыс. інвалідаў, сярод іх 27,4 тыс. дзяцей-інвалідаў ва ўзросце да 18 гадоў.
Нацыянальная бібліятэка Беларусі імкнецца стварыць усе ўмовы для таго, каб людзі з асаблівасцямі фізічнага развіцця не адчувалі цяжкасцей у карыстанні рэсурсамі бібліятэкі. Для асоб з парушэннямі апорна-рухальнага апарату прадугледжаны пандусы ў будынку бібліятэкі. Арганізаваны асобны гардэроб з нізкай стойкай. Рух па паверхах ажыццяўляецца з дапамогай ліфта.
Для свабоднага карыстання рэсурсамі бібліятэкі для асоб з абмежаванымі магчымасцямі ў агульнай чытальнай зале і зале для спецыялістаў з вышэйшай адукацыяй усталяваныя механічныя пад’ёмнікі, якія ажыццяўляюць функцыю спуску ў залы і пад’ёму наведвальніка, які знаходзіцца ў інваліднай калясцы. Для людзей са слабым зрокам і сляпых карыстальнікаў прадугледжаныя месцы ў індывідуальных кабінах, абсталяваных спецыяльнымі прыстасаваннямі: прыладай для павялічвання плоскадрукальваных тэкстаў (лупа), персанальным камп’ютэрам з русіфікаванай праграмай сінтэзу маўлення на рускай і англійскай мовах, брайлеўскім дысплеем да персанальнага камп’ютэра, чытаючай машынай для чытання плоскадрукавальных тэкстаў з выкарыстаннем сінтэтычнага маўлення, навушнікамі.
