6 лютага Нацыянальная бібліятэка правяла вэбінар для спецыялістаў бібліятэк, якія падключаюцца да рэгіянальных зводных электронных каталогаў у 2024 годзе.
У працы вэбінара ўзялі ўдзел 35 спецыялістаў публічных абласных і раённых бібліятэк краіны, якія адказваюць за камплектаванне і фарміраванне электронных каталогаў.
Падчас мерапрыемства Алена Ішуціна, загадчык сектара падтрымкі сістэмы карпаратыўнай каталагізацыі Нацыянальнай бібліятэкі Беларусі, расказала аўдыторыі аб арганізацыйных, тэхнічных і тэхналагічных аспектах падключэння бібліятэчных устаноў да рэгіянальных зводных электронных каталогаў.
На працягу 2024 года Вілейская раённая цэнтральная бібліятэка імя А. Новік, Глыбоцкая цэнтралізаваная бібліятэчная сістэма, Дзятлаўская раённая бібліятэка, Цэнтралізаваная бібліятэчная сетка Калінкавіцкага раёна, Цэнтралізаваная бібліятэчная сетка Асіповіцкага раёна і Чэрвеньская цэнтральная раённая бібліятэка будуць падключаны і прадставяць свае фонды ў рэгіянальных зводных электронных каталогах бібліятэк Беларусі.
Матэрыял пададзены аддзелам бібліятэчна-інфармацыйных тэхналогій.