15 мая ў Нацыянальнай бібліятэцы Беларусі былі падведзены вынікі XXV Рэспубліканскага конкурсу "Бібліятэка – асяродак нацыянальнай культуры".
Конкурс праводзіцца штогод сярод публічных бібліятэк краіны з мэтай павышэння ролі бібліятэк у фарміраванні нацыянальнай самасвядомасці насельніцтва, папулярызацыі нацыянальнай культуры, гісторыі, літаратуры, мовы, народных промыслаў, а таксама падтрымкі і развіцця чытання.
У рэспубліканскім этапе конкурсу прынялі ўдзел 36 публічных бібліятэк: 12 цэнтральных і 24 бібліятэкі-філіялы. Гродзенская і Магілёўская вобласці прадставілі на конкурс па 8 работ, Брэсцкая – 7, Мінская – 5, Віцебская – 4, Гомельская – 3, г. Мінск – 1.
Нягледзячы на невялікую, у параўнанні з мінулымі гадамі, колькасць прадстаўленых работ, члены журы адзначылі іх высокую якасць, разнастайнасць увасобленых ідэй, творчы падыход удзельнікаў.
Па выніках конкурсу будзе выдадзены загад міністра культуры Рэспублікі Беларусь. Пераможцы рэспубліканскага этапу конкурсу будуць узнагароджаны дыпломамі першай, другой, трэцяй ступеняў і грашовымі прэміямі.