Тэму далучэння новых аўдыторый у бібліятэку абмяркоўвалі 26 кастрычніка бібліятэкары краін СНД – удзельнікі праекта “Нашы бібліятэкі: руская мова як родная”, арганізаванага Камітэтам па знешніх сувязях Санкт-Пецярбурга сумесна з ЦГПБ імя У.У. Маякоўскага.
Увазе слухачоў былі прадстаўлены стратэгіі і практыкі далучэння новых аўдыторый, праекты бібліятэкі імя Маякоўскага ў культурна-дзелавой прасторы “Сеўкабель порт” і бібліятэчным цэнтры “Охта”.
Праца Маякоўкі ў сацыяльных сетках, Telegram і YouTube накіравана на папулярызацыю дзейнасці бібліятэкі, фарміраванне ў карыстальніка патрэбы ў чытанні і прыцягненне яго ва ўстановы культуры. У telegram-групах “Маяковка. События”, “Маяковка. Книги”, “Маяковка. Новости” вядзецца тэматычнае асвятленне дзейнасці бібліятэкі.
Папулярызацыя бібліятэчных акаўнтаў у сацыяльных сетках адбываецца з дапамогай QR-кодаў у буклетах і на інсталяцыях. Формы папулярызацыі – дайджэсты, асветніцкія пасты, прамыя трансляцыі, варажба па літаратурных творах. Сярод інструментаў папулярызацыі найбольш папулярныя рассылкі, трансляцыі, кліпы, мантажы выстаў-праекцый, інсталяцыі, мерчы.
Вялікі поспех мела інсталяцыя “ЛЮБЛЮБЛЮБЛЮБЛЮБЛЮ” ў двары бібліятэкі летам 2022 года. Яна суправаджалася публікацыямі ў сродках масавай інфармацыі, нанясеннем на графітныя паверхні вершаў У. Маякоўскага. Зона інсталяцыі прадугледжвала месцы для адпачынку і інстаграмную зону для фотаздымкаў. У telegram-боце была запушчана экскурсія “Гід па інсталяцыі” з інфармацыяй пра паэта, распрацавана спадарожная сувенірная прадукцыя Маякоўкі.
Другая частка пасяджэння круглага стала, накіраванага на прыцягненне чытацкай аўдыторыі, насіла групавы характар працы. Бібліятэкары краін СНД аналізавалі патэнцыйныя групы чытачоў, а таксама распрацоўвалі і прэзентавалі стратэгіі па прыцягненні карыстальнікаў у бібліятэку.
Матэрыял падрыхтаваны ўдзельніцай праекта Вольгай Палунчанкай, галоўным бібліёграфам АДІА НББ.
Чытайце таксама:
Спецыялізаваная культурна-адукацыйная праграма “Нашы бібліятэкі: руская мова як родная”
Рэсурснае забеспячэнне Цэнтральнай гарадской публічнай бібліятэкі імя У.У. Маякоўскага (г. Санкт-Пецярбург)
Супрацоўніцтва бібліятэк і тэатраў Санкт-Пецярбурга
Ультрасучасныя бібліятэкі Санкт-Пецярбурга – “Сфера” і “Шафа”