24 лістапада студэнты першага курса спецыяльнасці “эканамічная бяспека” вывучалі інфармацыйныя рэсурсы і сэрвісы Нацыянальнай бібліятэкі ў рамках двухбаковага супрацоўніцтва Міжнароднага ўніверсітэта МІПСА і галоўнай бібліятэкі краіны.
Будучыя кансультанты і аналітыкі па эканамічнай бяспецы, спецыялісты эканамічнай разведкі, супрацоўнікі кантрольна-рэвізійных службаў, аўдытары і рызыка-менеджары азнаёміліся з традыцыйнымі і электроннымі рэсурсамі Нацыянальнай бібліятэкі Беларусі, прадстаўленымі фондам друкаваных і электронных дакументаў, базамі даных уласнай генерацыі і вядучых сусветных вытворцаў.
Падчас трэнінгу, накіраванага на развіццё кампетэнтнасці выкарыстання інфармацыйных рэсурсаў, засваенне алгарытмаў пошуку ажыццяўлялася з улікам вывучаемых дысцыплін: логікі, інфармацыйнай і кадравай бяспекі, сучасных плацежных сістэм, аналізу гаспадарчай дзейнасці, канкурэнтнай разведкі, сістэмнага аналізу і ацэнкі фактараў эканамічнай бяспекі, кіраўніцкага і бухгалтарскага ўліку, аўдыту.
Акцэнт быў зроблены на асаблівасцях рэгістрацыі (анлайн і стацыянарна) і аддаленага (пры наяўнасці рэгістрацыі або адзінага пароля) выкарыстання ў адукацыйным працэсе якаснай вучэбнай літаратуры, прадстаўленай на платформах электронных бібліятэчных сістэм, даступных пры наяўнасці чытацкага білета.
Студэнтам былі прадстаўлены магчымасці аддаленага заказу літаратуры і дастаўкі лічбавых копій фрагментаў дакументаў, праверкі тэкстаў на наяўнасць запазычанняў у сістэмах “Антыплагіят” і “ПлагіятКантроль”, пошуку навуковай інфармацыі ў сетцы Інтэрнэт.
На платформах ліцэнзійных баз даных і навуковых рэсурсаў адкрытага доступу першакурснікі азнаёміліся з пералікам артыкулаў з перыядычных выданняў па пытаннях арганізацыі і метадаў правядзення падатковых праверак, судова-бухгалтарскай экспертызы, цэнаўтварэння і падаткаабкладання, псіхалогіі кіравання, рызыка-менеджменту, развіцця тэхналогій прадухілення супрацьпраўных дзеянняў у бізнэсе.
Магчымасць выкарыстання паслуг Віртуальнага цэнтра прававой інфармацыі выклікала асаблівую цікавасць, абгрунтаваную вывучэннем такіх дысцыплін, як фінансавае і гаспадарчае права, адміністрацыйна-дэліктнае права, грамадзянскі і гаспадарчы працэс. Набытыя бібліятэкай ліцэнзійныя базы даных прававой тэматыкі і падборка прававых інтэрнэт-рэсурсаў прадстаўляюць доступ да дакладнай і актуальнай юрыдычнай інфармацыі, важнай для фарміравання прафесійных кампетэнцый спецыялістаў у галіне эканамічнай бяспекі.
Агляд анлайн-сэрвісаў азнаёміў першакурснікаў з адрозненнямі крытэрыяў пошуку інфармацыі і методык выканання бясплатных віртуальных тэматычных даведак (“Спытай бібліятэкара”, “КОРУНБ” і “Задаць пытанне”) і платнай паслугі “Складанне спіса літаратуры па тэме”. Архівы віртуальных даведачных службаў дазваляюць з дапамогай доступу да выкананых тэматычных даведак сфармаваць бібліяграфічны спіс (кнігі, артыкулы, нарматыўна-прававыя акты) да навуковых прац па розных аспектах эканамічнай бяспекі.
Падчас мерапрыемства была акцэнтавана ўвага на асаблівасцях абслугоўвання, доступу да інфармацыйных рэсурсаў і зместу падсобных фондаў літаратуры аддзела даведачна-інфармацыйнага абслугоўвання, залы прававой інфармацыі і цэнтральнага падсобнага фонду.
Фонды галоўнай бібліятэкі краіны дазваляюць максімальна задаволіць інфармацыйныя патрэбы спецыялістаў у эканамічнай бяспецы, якія забяспечваюць бесперапыннасць і ўстойлівасць эканамічнай сістэмы, распрацоўку стратэгій развіцця, аналіз эканамічных рызык, прагназаванне і нейтралізацыю пагроз нацыянальнай бяспекі Рэспублікі Беларусь у эканамічнай сферы.
Тэматыка навучальных заняткаў Нацыянальнай бібліятэкі Беларусі па фарміраванні інфармацыйнай культуры карыстальнікаў разнастайная: “Пошук навуковай інфармацыі ў сетцы Інтэрнэт”, “Набытыя базы даных”, “Электронныя рэсурсы, створаныя Нацыянальнай бібліятэкай”, “Асновы пошуку: каталогі, бібліяграфія, даведачныя выданні”, “Пошук інфармацыі па электронных і картачных каталогах”, “Рэсурсы і паслугі бібліятэкі: коратка пра галоўнае”, “Афармленне бібліяграфіі да навуковай працы”, “Як скарыстацца рэсурсамі, не выходзячы з дому”.
Заказаць заняткі можна па тэлефоне: (8 017) 293 27 39, e-mail: osio@nlb.by.
Матэрыял пададзены аддзелам даведачна-інфармацыйнага абслугоўвання.