17 мая ў “Мінск-Арэне” прайшла цырымонія ўзнагароджання пераможцаў конкурсу “Інтэрнэт-прэмія «ТІБО»”.
Прафесійная прэмія міжнароднай спецыялізаванай выстаўкі “ТІБО” штогод прысуджаецца сеткавым работам, створаным у нацыянальным сегменце глабальнай сеткі Інтэрнэт, за важкія сацыякультурныя, тэхналагічныя і мастацкія дасягненні ў галіне інфармацыі, культуры, мастацтва і адукацыі.
У 2018 годзе на конкурс было пададзена 330 заявак. Па выніках конкурсу кампетэнтнае журы вызначыла пераможцаў у 10-ці намінацыях. Сярод лаўрэатаў – сайты органаў дзяржаўнага кіравання, устаноў культуры, навукі, адукацыі, медыцыны, спорту і турызму, банкаў, СМІ, прыватных і дзяржаўных прадпрыемстваў.
Новы інтэрнэт-партал Нацыянальнай бібліятэкі Беларусі, распрацаваны кампаніяй “Астронім сістэмс”, атрымаў высокую ўзнагароду ў намінацыі “Адукацыя і навука”.
У цырымоніі ўзнагароджання прынялі ўдзел намеснік дырэктара Нацыянальнай бібліятэкі Беларусі па інфармацыйных рэсурсах Таццяна Кузьмініч, загадчыца аддзела суправаджэння інтэрнэт-партала Нацыянальнай бібліятэкі Беларусі Юлія Кісялёва і дырэктар ТАА “Астронім сістэмс” Багдан Каравец.
Віншуем калектыў Нацыянальнай бібліятэкі Беларусі
з прэстыжнай прэміяй!
Прызнанне на такім высокім узроўні – гэта заслуга ўсяго калектыву, які працуе на вынік, і моцны стымул да далейшага развіцця і руху наперад.
