29–30 верасня ў Нацыянальнай бібліятэцы Арменіі адбылася міжнародная канферэнцыя “Захаванне спадчыны для стабільнай будучыні”, прысвечаная 510-годдзю армянскага кнігадрукавання. Канферэнцыя аб’яднала вядучых і маладых спецыялістаў бібліятэчнай сферы з усяго свету.
Супрацоўнікі Нацыянальнай бібліятэкі Беларусі ў рэжыме анлайн таксама ўзялі ўдзел у форуме.
Генеральны дырэктар Аксана Кніжнікава выступіла з дакладам “Гістарычная памяць у кніжнай спадчыне: фарміраванне, захаванне, вывучэнне дакументнага фонду Нацыянальнай бібліятэкі Беларусі як фундаментальнай часткі інфармацыйных рэсурсаў”.
Ала Шарамецьева, начальнік інфармацыйнага цэнтра, прадставіла даклад “Інтэграцыя лічбавага бібліяграфічнага кантэнту бібліятэк Беларусі”.
Вячаслаў Брычкоўскі, загадчык сектара інавацыйнага развіцця бібліятэчна-інфармацыйных працэсаў, азнаёміў калег з дакладам “Праблемы і перспектывы арганізацыі доўгачасовага захавання лічбавай культурнай спадчыны”.
Удзел у канферэнцыі дазволіў абмеркаваць перспектывы і стратэгічныя напрамкі супрацоўніцтва бібліятэк у частцы павышэння якасці бібліятэчнага абслугоўвання і папулярызацыі пісьмовай спадчыны.
Матэрыял пададзены аддзелам сувязей з грамадскасцю.