28 сакавіка ў Брэсцкай абласной бібліятэцы імя М. Горкага адбылася прэзентацыя новага праекта “Гістарычныя сімвалы Берасця”, у якой прыняў удзел намеснік дырэктара па навуковай рабоце і выдавецкай дзейнасці Нацыянальнай бібліятэкі Беларусі Аляксандр Суша.
У рамках праекта запланавана правядзенне серыі адкрытых публічных лекцый, прысвечаных асноўным культурным сімвалам горада: Брэсцкай Бібліі, Брэсцкай уніі, Брэсцкаму міру і Брэсцкай крэпасці.
Аляксандр Суша выступіў з лекцыяй і відэапрэзентацыяй на тэму “Берасцейская Біблія як культурны брэнд горада, вобласці, краіны”. Ён закрануў тэмы вывучэння эпохі Адраджэння і Рэфармацыі, гісторыі кнігавыдавецкай справы і Берасцейскай друкарні XVI ст., жыцця і дзейнасці князя-асветніка Мікалая Радзівіла Чорнага. Асноўная ўвага ў выступленні была нададзена гісторыі стварэння і вывучэння Брэсцкай Бібліі.
Па матэрыялах сайта Брэсцкай абласной бібліятэкі імя М. Горкага.