17 лютага ў музеі кнігі адбылася перадача ў дар старадрукаваных кірылічных выданняў з Магілёўскай друкарні ад прадстаўнікоў старэйшага ў Беларусі мотаклубу ўладальнікаў матацыклаў Harley-Davidson.
Кніжны фонд Нацыянальнай бібліятэкі Беларусі папоўніўся стараверскімі выданнямі "Часоўнік" і "Псалтыр", якія былі надрукаваныя ў 30-х гадах XVIIІ стагоддзя.
З прывітальным словам да ўдзельнікаў мерапрыемства звярнуўся намеснік генеральнага дырэктара Нацыянальнай бібліятэкі Беларусі Віктар Пшыбытка. Ён адзначыў важнае месца своеасаблівай кніжнай культуры старавераў у беларускім кнігадрукаванні і выказаў словы падзякі за кніжныя помнікі, якія папоўняць каштоўныя калекцыі бібліятэкі.
Намеснік дырэктара мотаклубу H.O.G Minsk Chapter Belarus Аляксандр Шугай расказаў пра святкаванне 10-годдзя мотаклуба і пра культурныя акцыі, якія ствараюць свята не толькі для аматараў мотаруху, але і для кожнага неабыякавага. Ён падкрэсліў, што Нацыянальная бібліятэка як галоўная захавальніца кніжнай спадчыны – гэта месца сілы ведаў, і дадаў, што клуб рады папоўніць бібліятэчны фонд.
Галіна Кірэеева, галоўны бібліёграф навукова-даследчага аддзела кнігазнаўства, падрабязней пазнаёміла гасцей з выдавецкім рэпертуарам і асаблівасцямі друку для старавераў у Магілёўскай друкарні.
Матэрыял пададзены навукова-даследчым аддзелам кнігазнаўства.
