28 мая ў бібліятэцы працягваў працаваць VI Форум бібліятэкараў Беларусі “Гуманітарна-асветніцкая дзейнасць бібліятэк у кантэксце агульначалавечых каштоўнасцей і беларускай дзяржаўнасці”.
Другі дзень працы форуму пачаўся з пасяджэння круглага стала “Арганізацыйныя і нарматыўныя аспекты дзейнасці Беларускай бібліятэчнай асацыяцыі ў новым складзе”.
Члены Савета Беларускай бібліятэчнай асацыяцыі, кіраўнікі і спецыялісты бібліятэчнай сферы абмеркавалі Палажэнне аб краязнаўчай дзейнасці бібліятэк Рэспублікі Беларусь, прыярытэты дзейнасці асацыяцыі на перыяд да 2024 года і яе ўзаемадзеянне з органамі дзяржаўнага кіравання.
Таксама адбылося пасяджэнне секцыі “Актуальныя пытанні дзейнасці бібліятэк на сучасным этапе”.
Удзельнікі падзяліліся меркаваннем аб прафесіі бібліятэкара ў новай рэальнасці, вопытам работы ў арганізацыі інтэрактыўных выстаў, абслугоўвання карыстальнікаў ва ўмовах пандэміі, поспехамі ў праектнай і інавацыйнай дзейнасці, распавялі аб новых інструментах папулярызацыі бібліятэкі, кнігі і чытання.
Усе спікеры сесіі падкрэслілі: сёння важную ролю ў дасягненні поспеху адыгрываюць эфектыўныя прафесійныя камунікацыі і цеснае ўзаемадзеянне.
Праграма мерапрыемстваў уключала і правядзенне майстар-класаў. Загадчыца аддзела галерэйна-выставачнай дзейнасці Нацыянальнай бібліятэкі Беларусі Ірына Якаўлеўна Васільковіч пазнаёміла калег з практыкай стварэння комплексных выставачных праектаў на прыкладзе паспяховай выставы кніжнай графікі Беларусі “ILLUSTRATIO. Разнастайнасць тэхнік ілюстравання”.
Скончыўся форум выніковым пасяджэннем, дзе ўдзельнікі абмеркавалі вынікі плённай працы па абмене вопытам, пошуку новых ідэй і матывацыі і выпрацавалі новыя кірункі ўзаемадзеяння бібліятэк краіны.
Матэрыял падрыхтаваны аддзелам сувязей з грамадскасцю.
Чытайце таксама: