22 красавіка для навучэнцаў ваенна-патрыятычнага клуба “Гонар” ДУА “Сярэдняя школа № 24 г. Мінска” адбыўся новы бібліяграфічны ўрок “Роля НКУС, міліцыі і піянерыі ў вызваленні Беларусі ад нямецка-фашысцкіх захопнікаў” з цыкла заняткаў “Пастараемся ж і мы быць годнымі іх Вялікай Перамогі”, што рэалізуюцца Нацыянальнай бібліятэкай Беларусі да 80-годдзя Вялікай Перамогі сумесна з упраўленнямі па адукацыі г. Мінска.
Адваяванае мірнае неба абавязвае нас у адпаведнай узросту дзяцей форме распавядаць пра подзвігі герояў Вялікай Айчыннай вайны. Наша галоўная задача – сфарміраваць у падрастаючага пакалення моцны інфармацыйны імунітэт да фальсіфікацыі гісторыі. Будучыня Беларусі за маладым пакаленнем, здольным годна памяці загінулых супрацьстаяць унутраным і знешнім пагрозам нацыянальнай бяспецы сваёй Радзімы.
Бібліяграфічны ўрок “Роля НКУС, міліцыі і піянерыі ў вызваленні Беларусі ад нямецка-фашысцкіх захопнікаў” распрацаваны Нацыянальнай бібліятэкай па ініцыятыве Уладзіміра Апановіча, кіраўніка па ваенна-патрыятычным выхаванні СШ № 24. Патрыятычнае выхаванне школьнікаў накіравана на фарміраванне ў вучняў патрыятычнай свядомасці, пачуцця вернасці Радзіме, гатоўнасці да выканання задач па абароне Айчыны і авалодання для гэтага неабходнымі ведамі, уменнямі і навыкамі.
Усяму свету вядомы гераічныя подзвігі абаронцаў Брэсцкай крэпасці, якую разам з асабовым складам 333-га стралковага палка і пагранічнікамі абаранялі байцы 132-га асобнага канвойнага батальёна войскаў НКУС. Удзел супрацоўнікаў органаў унутраных спраў ва ўсенароднай узброенай барацьбе насіў разнастайны характар і вызначаўся абставінамі, якія склаліся. Гэта былі арганізавана-кіруемыя сілы, якія дзяржава накіроўвала на рашэнне розных задач ваеннага часу.
З лета 1941 г. падпольныя піянерскія атрады і групы дзейнічалі ў многіх беларускіх гарадах і населеных пунктах. У загадзе, выдадзеным адным з генералаў вермахта адзначана: “Усімі сродкамі перашкаджаць грамадзянскім асобам хадзіць па чыгунках. Асабліва трэба сцерагчыся ўсюдыісных хлапчукоў савецкай арганізацыі піянераў”. Тысячы піянераў сыходзілі ў партызанскія атрады, станавіліся санітарамі і сувязнымі, разведчыкамі і ўдзельнікамі баявых аперацый.
Выкарыстаныя пры правядзенні заняткаў метадычныя прыёмы: экскурсія, інфармацыйнае паведамленне, прэзентацыя, бібліяграфічны агляд літаратуры, практычная частка, агляд экспазіцый “Мова ваеннай ілюстрацыі” і “Аўтографы мужнасці”, раздатачны матэрыял для самастойнай працы, гутарка.
Будучыя абаронцы Айчыны азнаёміліся з алгарытмамі пошуку інфармацыі па тэме ў электронным каталогу і БД “Беларусь ад мінулага да сучаснага”. Павышаная цікавасць да ваеннай вучэбнай і навуковай літаратуры абгрунтавана актыўнасцю ВПК “Гонар”. Рабяты актыўна наведваюць вайсковую частку АМАПа, мерапрыемствы МУС у Палацы Рэспублікі, урокі мужнасці з Аляксеем Талаем, Цэнтральны музей унутраных войскаў МУС Рэспублікі Беларусь на базе в/ч 5448, сумесна з супрацоўнікамі РУУС высаджвалі алеі да 80-годдзя Вялікай Перамогі.
Асаблівасці працы з картачнай бібліяграфіяй школьнікі асвойвалі па станцыях сістэматычнай картатэкі артыкулаў: “Гісторыя Камітэта дзяржаўнай бяспекі” – “Гісторыя міліцыі” – “Беларуская рэспубліканская піянерская арганізацыя” – “Змест, формы і метады піянерскай работы” – “Злёты і пленумы піянерскіх арганізацый” – “Злёты і пленумы піянерскіх важатых” – “Гісторыя піянерскай арганізацыі Беларусі” – “Піянеры ў гады Вялікай Айчыннай вайны” – “Персаналіі піянерважатых”. Храналагічная глыбіня архіва датуецца 1925 г.
Практычная частка ўключала працу з заказанай літаратурай у адпаведнасці са спецыяльна падрыхтаваным для навучэнцаў ВПК “Гонар” рэкамендацыйным спісам артыкулаў за 1993–2023 гг. “Дзейнасць піянерскіх арганізацый, міліцыі і Народнага камісарыята ўнутраных спраў у гады Вялікай Айчыннай вайны”. Школьнікі вывучалі матэрыялы па падгрупах – “Піянерскія арганізацыі”, “Міліцыя”, “Народны камісарыят унутраных спраў” – і дзяліліся з аднакласнікамі ўражаннямі.
Літаратура аб дзейнасці піянерскай арганізацыі Беларусі ў гады Вялікай Айчыннай вайны ўключала крыніцы аб подзвігах юных патрыётаў: М. Казея, У. Шчарбацэвіча, Г. Юшкевіча, У. Матусевіча, А. Вольскага, Г. Занько, А. Ульянава, Л. Герасіменка, М. Гурло, У. Барсука, В. Мельнікава. Друкаваныя выданні пазнаёмілі рабят з вытокамі і перадумовамі арганізацыі малодшай галіны піянерскага руху, усесаюзнай пяцідзёнкай акцябрат, гісторыяй развіцця піянерскага руху ў Рэспубліцы Беларусь і дзіцячага руху г. Мінска 1920–1988 гг., піянерскай поштай СШ № 1 г. Пружаны Брэсцкай вобласці (у 1968 г.было створана піянерскае паштовае аддзяленне), сучасным станам развіцця грамадскага аб’яднання “Беларуская рэспубліканская піянерская арганізацыя”, формамі работы раённых піянерскіх арганізацый і тэндэнцыямі развіцця каштоўнасных арыенціраў піянерскага руху ў Рэспубліцы Беларусь.
Матэрыялы па гісторыі міліцыі распавялі пра службу ў гады Вялікай Айчыннай вайны камандзіра аддзялення дывізіёна міліцыі старшыны Васіля Гаўрылюка, генерал-маёра міліцыі Генадзя Пукава, ролі работнікаў міліцыі і батальёна капітана Канстанціна Уладзімірава ў абароне г. Магілёва, палкоўніка міліцыі ў адстаўцы і ўдзельніка штурму Берліна Сяргея Пыко, арганізацыі і асноўных напрамках дзейнасці міліцыі ў пачатковы перыяд Вялікай Айчыннай вайны.
Крыніцы аб Народным камісарыяце ўнутраных спраў прыадчынілі заслону гісторыі аб дзейнасці ў гады Вялікай Айчыннай вайны: аператыўна-чэкісцкіх груп і атрадаў, зніклых без вестак у 1942–1943 гг. спецгруп НКУС – НКДБ БССР, пагранічных і ўнутраных войскаў па ахове тылу дзеючай арміі, 53-га аператыўнага мотастралковага палка НКУС БССР, удасканаленні разведвальнай работы органаў дзяржаўнай бяспекі за перыяд акупацыі тэрыторыі Беларусі, асновах барацьбы НКУС – МУС Беларусі з дзіцячай безнагляднасцю і беспрытульнасцю, арганізацыі і тактыцы зафрантавой працы органаў дзяржаўнай бяспекі ў перыяд падрыхтоўкі і правядзення аперацыі “Баграціён”.
Кніжны фонд і інфармацыйнае асяроддзе Нацыянальнай бібліятэкі Беларусі забяспечвае рэалізацыю палажэнняў Праграмы бесперапыннага выхавання дзяцей і навучэнскай моладзі на 2021–2025 гг. Дзейнасць галоўнай бібліятэкі краіны накіравана на фарміраванне інфармацыйнай культуры карыстальнікаў з улікам палажэнняў Канцэпцыі нацыянальнай бяспекі Рэспублікі Беларусь у інфармацыйнай сферы. Бібліяграфічныя ўрокі садзейнічаюць фарміраванню ведаў, уменняў і навыкаў пошуку якаснай вучэбнай і навуковай інфармацыі. Сацыякультурнае і эстэтычнае асяроддзе беларускага “алмаза ведаў” з дапамогай культурных мерапрыемстваў і галерэйна-выставачнай дзейнасці спрыяюць духоўна-маральнаму развіццю і выхаванню асобы. Нацыянальная бібліятэка Беларусі заўсёды рада актыўнаму выкарыстанню кніжнага фонду падрастаючым пакаленнем і ўдзелу ў імрэзах духоўна-маральнай накіраванасці.
Цыкл заняткаў “Пастараемся ж і мы быць годнымі іх Вялікай Перамогі”, прымеркаваны да 80-годдзя Вялікай Перамогі, уключае наступныя бібліяграфічныя ўрокі: “Непаўторная вясна 1940”, “Роля НКУС, міліцыі і піянерыі ў вызваленні Беларусі ад нямецка-фашысцкіх захопнікаў”, “Даведачная літаратура пра Герояў Вялікай Айчыннай вайны”, “Воіны-інтэрнацыяналісты ў вызваленні Беларусі ад нямецка-фашысцкіх захопнікаў”, “Брэсцкая крэпасць-герой”, “Героі Савецкага Саюза, якія вызвалялі Беларусь: па старонках друкаваных дакументаў і электронных рэсурсаў”, “Біяграфічная і бібліяграфічная інфармацыя пра Героя Савецкага Саюза Мамадалі Тапвалдыева”.
Заказаць поўны цыкл або асобныя заняткі можна па тэлефонах: (8 017) 293 27 40, (8 029) 198 41 83; e-mail: polunchenkoolga@yandex.by.
Матэрыял пададзены аддзелам даведачна-інфармацыйнага абслугоўвання.