Сёння мы пачынаем знаёміць вас з новай рубрыкай “Паштоўкі і плакаты з фондаў Нацыянальнай бібліятэкі Беларусі”.
Унікальная рубрыка “Паштоўкі і плакаты з фондаў Нацыянальнай бібліятэкі Беларусі” папулярызуе для шырокай аўдыторыі багацце выяўленчых дакументаў, захоўваемых у “алмазе ведаў”, тых каштоўнасцей, якія часам незаслужана застаюцца па-за ўвагай чытачоў. Эстампы з аўтографамі, лінарыты, малюнкі і эскізы, выявы з фотахронікі ТАСС і БЕЛТА, плакаты савецкага часу, каталогі выставак, тэатральныя афішы і фотафрагменты з тэатральных пастановак, паштоўкі розных часоў – усе гэтыя каштоўныя дакументы дэманструюцца ў экспазіцыях рубрыкі, прысвечаных розным тэмам, святам, падзеям з гісторыі сусветнай культуры і мастацтва.
Сёлета адзначаецца 185-годдзе з дня вынаходства фатаграфіі. Яе гісторыя пачалася яшчэ ў эпоху Рэнесансу, калі мастакі карысталіся першымі камерамі-абскурамі. Аднак менавіта ў студзені 1839 года ў Французскай акадэміі навук быў прадстаўлены даклад пра новы спосаб стварэння выяў, распрацаваны Ньепсам, Дагерам, Фоксам Тальбатам і іншымі.
Экспазіцыя “Погляд скрозь час” пазнаёміць з гісторыяй узнікнення фатаграфіі, дагератыпамі, эвалюцыяй фотаапаратаў, а таксама з творчасцю сусветных фатографаў: А. Карцье-Брэсона, А. Адамса, Й. Судэка і інш. Цікавымі будуць фота нашых землякоў – беларускіх фатографаў Я. Булгака, М. Напельбаума, сучасных аўтараў (В. Лабко, Ю. Васільева, Ю. Іванова, В. Вядрэнкі, астрафатографа В. Малышчыца).
Матэрыял пададзены аддзелам абслугоўвання спецыялізаванымі фондамі.
