Выйшла з друку кніга выбраных твораў Янкі Купалы, укладзеная знаным літаратуразнаўцам Ганнай Севярынец.
Кніга выбраных твораў Янкі Купалы мае мэтай прадставіць чытачу нечаканага класіка ў сучасным прачытанні. Выданне дапоўнена літаратуразнаўчымі каментарамі да кожнага твора, кароткім летапісам жыцця і творчасці, мемуарнымі сведчаннямі, невядомымі крытычнымі артыкуламі. У кнізе прадстаўлены і пракаментаваны 37 вершаў, 3 паэмы (“Бандароўна”, “Курган”, “Безназоўнае”) і 2 драмы (“Раскіданае гняздо”, “Тутэйшыя”).
Ганна Севярынец
“Няма нічога больш канструктыўнага ў спасціжэнні роднай літаратуры, чым узяць і адмовіцца ад папярэдняга канона, паставіць традыцыю і хрэстаматыю дагары нагамі, рашуча адмовіцца ад састарэлых догмаў – і паглядзець на класічныя тэксты вачыма сучаснікаў. Як яны тады ажываюць, якім новым сэнсам адкрываюцца, як шчыра радуюцца свежаму ветру і маладому прачытанню – любата!..” – піша Ганна Севярынец.
Кніга выйшла ў выдавецтве “Лімарыус” у серыі “Наш сучаснік”. Замовіць яе можна тут.
Крыніца: Будзьма беларусамі!