У полацкім Музеі беларускага кнігадрукавання рыхтуюцца адзначыць 500-годдзе кнігадрукавання на землях ВКЛ і 500-годдзе “Малой падарожнай кніжкі”. Плануецца шэраг мерапрыемстваў, ладзіцца выстава “Кніжка маленькая, а справа вялікая”.
Пра гэта распавяла загадчыца музея Славіна Вячаславаўна Гаўрылава.
– Наш музей быў адчынены 8 верасня 1990 года, да 500-годдзя з дня нараджэння асветніка і першадрукара Францыска Скарыны. Яго адкрываў Анатоль Іванавіч Бутэвіч. На адкрыцці прысутнічаў нашчадак першадрукара Стэнлі Скарына і іншыя ганаровыя госці. Звычайна скарынаўскія дні праводзяцца ў нас у верасні, калі мы запрашаем навучэнцаў навучальных устаноў наведаць наш музей. Сёлета, у жніўні, мы плануем адкрыццё запланаванай выставы “Кніжка маленькая, а справа вялікая”.
Наша мэта – папулярызаваць больш за 1400 прадметаў з фондаў Нацыянальнага Полацкага гісторыка-культурнага музея-запаведніка, звязаных з Ф. Скарынам, Скарыніянай і творчасцю беларускіх пісьменнікаў. Адна з заляў захоўвае копіі кніг Ф. Скарыны, выявы гарадоў, дзе ён жыў і працаваў, – Полацка, Кракава, Прагі, Вільні. У іншай залі прадстаўлены даследаванні і выданні розных часоў, прысвечаныя першадрукару: пачынаючы з кнігі 1888 года выдання расійскага славіста Пятра Уладзімірава, твораў В. Ластоўскага і кнігі А. Клышкі.
Але ў нашым музеі дэманструецца толькі копія “Малой падарожнай кніжкі”. А сама кніга захоўваецца ў калекцыі “Белгазпрамбанка”, у нас яна дэманстравалася ў 2017 годзе.
Самай старой кнігай, якая ў нас знаходзіцца, з’яўляецца выданне 1558 года Джаралама Фалеці “12 прамоваў”, якое паходзіць з друкарні Альдаў у Італіі, у якой авалодваў майстэрствам кнігадрукавання Францыск Скарына.
Мы таксама расказваем нашым гасцям пра знакамітых асоб, народжаных у нашым горадзе. Ураджэнцамі Полацка з'яўляюцца Уладзімір Арлоў і Навум Гальпяровіч, ганаровымі грамадзянамі горада былі пісьменнік Алесь Савіцкі, мастачка Нэлі Шчасная і іншыя выбітныя асобы. На Полаччыне пачынаў журналісцкую дзейнасць паэт Генадзь Мікалаевіч Бураўкін.
Сёлета будзе адзначацца шэраг важных юбілеяў: 210- годдзе Полацкай Езуіцкай акадэміі, 140 гадоў з дня нараджэння Якуба Коласа і Янкі Купалы, 1030 гадоў існавання праваслаўя на беларускіх землях. Да гэтых падзей мы плануем праводзіць мерапрыемствы і выставы. Для школьнікаў і студэнтаў у нас пастаянна праходзяць заняткі, лекцыі, экскурсіі па музеі.
– Наш Музей беларускага кнігадрукавання, – дадае Славіна Вячаславаўна, – з’яўляецца адным з 11 музеяў Нацыянальнага Полацкага гісторыка-культурнага музея-запаведніка, якія варта наведаць. Ён знаходзіцца ў былым жылым корпусе Богаяўленскага манастыра ХVI стагоддзя. У зборы экспанатаў прымалі ўдзел кнігазнаўцы, пісьменнікі, літаратуразнаўцы, мастацтвазнаўцы, супрацоўнікі найбуйнейшых бібліятэк і музеяў былога СССР, у тым ліку А. Мальдзіс, А. Петрашкевіч, В. Чамярыцкі, Л. Уладзіміраў, А. Цеханавецкі, М. Нікалаеў. Вялікую ролю ў фарміраванні музейных фондаў адыграў багаты кнігазбор журналіста А. Матусевіча.
Аўтар публікацыі: Эла Дзвінская, фота аўтара.