Пажарная бяспека ў дачных пабудовах і на прысядзібных участках

Падраздзяленні пажарнай аварыйна-выратавальнай службы рэгулярна выязджаюць на тушэнне пажараў, што ўзніклі па віне гаспадароў, якія спрабавалі самастойна, без прыцягнення супрацоўнікаў газавай гаспадаркі, усталяваць сістэму газавага ацяплення (ААГВ). Пажары, якія ўзнікаюць з-за неасцярожнага абыходжання з газавымі прыборамі, як правіла, суправаджаюцца выбухамі, таму лічацца надзвычай небяспечнымі.

Каб пазбегнуць аварыйнай сітуацыі, неабходна ведаць і захоўваць наступныя правілы пажарнай бяспекі, што прад’яўляюцца да газавых прыбораў:

1. Нельга пакідаць незакрытымі краны газавых прыбораў,ставіць мэблю і іншую маёмасць бліжэй чым за 20 сантыметраў ад газавга прыбора;
2. Рукаяткі, якія рэгулююць паступленне газу да гарэлак, неабходна перыядычна змазваць, таму што іх недасканалае функцыянаванне можа прывесці да ўцечкі газу;
3. Перыядычна трэба правяраць цягу ў коміне. Пры нармальнай цязе полымя запалкі, паднесенай да края каўпака або вочка топачных дзверак, павінна ўцягвацца ўнутр;
4. Газавыя балоны (рабочы і запасны) для забеспячэння бытавых газавых прыбораў павінны размяшчацца па-за будынкамі ў прыбудовах з негаручых матэрыялаў на адлегласці не бліжэй за 5 метраў ад уваходу ў будынак; Прыбудовы для газавых балонаў неабходна закрываць на замок, мець жалюзі для праветрывання і папераджальныя надпісы «Вогненебяспечна. Газ».
5. Забараняецца:
   • выкарыстанне газавых прыбораў пры ўцечцы газу;
   • далучэнне газавай арматуры з дапамогай іскраўтваральнага інструменту;
   • праверка герметычнасці злучэнняў з дапамогай крыніц адкрытага полымя (у тым ліку запалак, запальніц, свечак);
   • правядзенне рамонту напоўненых газам балонаў.
6. Пры закрыцці дач, садовых домікаў на доўгі час электрасетку неабходна абясточыць, вентылі (клапаны) балонаў з газам шчыльна закрыць.

На жаль, належную ўвагу правілам пажарнай бяспекі надаюць не ўсе.

Аднак трэба памятаць, што платай за незахаванне правілаў пажарнай бяспекі можа стаць не толькі спаленая маёмасць, але і чалавечыя жыцці.