Дата правядзення
Час правядзення
Месца правядзення
З 4 сакавіка па 20 красавіка ў зале беларускай літаратуры (пам. 205) праходзіць юбілейная выстаўка “На дарогах жыцця”, прымеркаваная да 100-годдзя з дня нараджэння беларускага пісьменніка, драматурга, перакладчыка Мікалая Іванавіча Гамолкі (1922–1992).
За многія гады актыўнай творчай працы М. Гамолка стаў вядомы шматлікім чытачам як аўтар вершаў, аповесцей і апавяданняў для дзяцей і дарослых. Праца, вучоба, сяброўства, шчырасць ва ўзаемаадносінах, адказнасць за свае ўчынкі, мужнасць у цяжкіх жыццёвых абставінах – вось пра што вядзе свой мастацкі расказ пісьменнік.
У першым раздзеле экспазіцыі прадстаўлена літаратурная спадчына М.І. Гамолкі: выбраныя творы пісьменніка, паэтычныя зборнікі “Зварот шчасця”, “Б’юць куранты”, прыгодніцкая аповесць “Лета ў Калінаўцы”, навукова-фантастычны раман “Шосты акіян” і інш.
Мікола Гамолка належыць да пакалення пісьменнікаў, чыё юнацтва прыйшлося на гады Вялікай Айчыннай вайны. Яе суровы подых прысутнічаў амаль ва ўсіх яго творах – аповесцях “Девушка шла по войне”, “Сокалы-сакаляняты”, “Лясная крэпасць”, “Партызанскія сёстры”. Аўтар паказаў выпрабаванне чалавечых характараў, праяўленне гераізму, самаадданасці ў імя перамогі над ворагам. Вайна не рамантыка, а цяжкія, суровыя будні ў барацьбе за жыццё, за існаванне на зямлі, – такая думка праходзіць праз усю творчасць М. Гамолкі.
Перакладчыцкай дзейнасці Мікалая Іванавіча прысвечаны другі раздзел выстаўкі. Дзякуючы пісьменніку на беларускай мове загучалі паасобныя вершы А. Твардоўскага, М. Ісакоўскага, П. Тычыны і інш.
З літаратурна-крытычнымі публікацыямі пра жыццё і творчасць М.І. Гамолкі знаёміць чытачоў заключны раздзел экспазіцыі: прадстаўлена даведачна-энцыклапедычная літаратура, перыядычныя выданні.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Прадстаўленыя ў экспазіцыі кнігі можна заказаць праз электронны каталог Нацыянальнай бібліятэкі Беларусі.
Тэлефон для даведак: (8 017) 293 27 16.
Матэрыял пададзены аддзелам абслугоўвання спецыялізаванымі фондамі.