Дата правядзення
Час правядзення
Месца правядзення
16 сакавіка а 12-й гадзіне ў музеі кнігі адбудзецца ўрачыстае адкрыццё выставы “Шэсць стагоддзяў гісторыі медыцыны і фармацыі ў рарытэтах Нацыянальнай бібліятэкі Беларусі”, прымеркаванай да 100-годдзя ўтварэння РУП “Белфармацыя”.
Развіццё ведаў аб медыцыне і фармацыі шырока адлюстроўвалася на старонках малавядомых кніг і выданняў, якія захоўваюцца ў Нацыянальнай бібліятэцы.
На выставе будзе прадстаўлена большасць кніг з фонду бібліятэкі па наступных раздзелах:
- лекавыя расліны (фармакагнозія);
- медыцына;
- аптэчная справа;
- вучэнне аб леках (фармакалогія).
Адзін з самых старажытных экспанатаў экспазіцыі – “Гербарый” 1484 года выдання, надрукаваны Петэрам Шоферам (Peter Schöffer) у Майнцы. У кнізе апісаны і праілюстраваны 150 раслін. Гравюры (на дрэве) расфарбаваны ад рукі зялёным, жоўтым, чырвоным і сінім. Цікава, што выданне паходзіць са знакамітага нясвіжскага кнігазбору Радзівілаў.
Яшчэ адзін “Гербарый” надрукаваны ў Венецыі ў 1509 годзе. У кнізе змешчаны 150 ксілаграфічных гравюр з выявамі лекавых раслін.
Асабліва значным выданнем па медыцыне з’яўляецца “Салернскі кодэкс здароўя”. У ім аўтар, іспанскі медык і алхімік Арнольд з Вілановы, прадставіў у вершах медыцынскае крэда Салернскай школы ў галіне правільнага харчавання і прадухілення захворванняў.
Вялікую цікавасць прадстаўляюць кнігі, якія адлюстроўваюць развіццё аптэчнай справы ў розныя гістарычныя перыяды.
РУП “Белфармацыя” – самая буйная фармацэўтычная арганізацыя Мінска, якая з’яўляецца неад’емнай часткай сістэмы аховы здароўя Беларусі. Асноўныя мэты прадпрыемства – захаванне здароўя і паляпшэнне якасці жыцця людзей.
У апошнія дзесяцігоддзі праяўляецца вялікая цікавасць да гісторыі айчыннай аховы здароўя. На працягу стагоддзяў у нас сфарміравалася багатая і своеасаблівая медыцынская культура, якая творча ўвабрала ў сябе вопыт лячэбнай і аптэчнай справы розных школ і краін.
Выстава будзе працаваць у музеі кнігі (пам. 347) да 9 жніўня 2022 г.
Дата яе завяршэння можа быць зменена.
Час работы выставы адпавядае рэжыму работы музея кнігі.
Уваход на адкрыццё вольны. У астатнія дні – па чытацкім білеце або білеце сацыякультурнага цэнтра.
Тэлефоны для даведак: (8 017) 293 27 81, 293 27 22, 293 27 79.
“Белфармацыя скрозь 100-годдзе”: фотавыстава да 100-годдзя РУП “Белфармацыя”.
Матэрыял пададзены навукова-даследчым аддзелам кнігазнаўства.