22 сакавіка ў рамках серыі мерапрыемстваў віртуальнай чытальнай залы Нацыянальнай бібліятэкі прайшоў семінар “Электронная бібліятэка «РУКОНТ» для адукацыі, культуры і навукі”.
Электронная бібліятэка “РУКОНТ” – гэта міжгаліновая сістэма, якая змяшчае больш за 590 000 дакументаў як вядучых, так і рэгіянальных выдавецтваў Расіі: перыядычныя выданні, рэгіянальныя лічбавыя рэсурсы, манаграфіі, у тым ліку навучальныя і навуковыя выданні найбуйнейшых расійскіх ВНУ і інш.
У якасці запрошанага эксперта семінара выступіў Міхаіл Дзегцяроў, генеральны дырэктар Цэнтральнага калектара бібліятэк “БИБКОМ”. У сваім выступленні ён прадставіў агляд магчымасцей і асаблівасцей выкарыстання электроннай бібліятэкі.
Удзельнікі пазнаёміліся з кніжнымі і перыядычнымі выданнямі, прадстаўленымі на платформе “РУКОНТ”. Асаблівая ўвага была ўдзелена выдавецтву “Советский спорт”, якое спецыялізуецца ў сферы фізічнай культуры і спорту, і выдавецтву “Колос-с” – у сферы сельскай гаспадаркі.
Мерапрыемства прайшло ў змешаным фармаце. У ім узялі ўдзел больш за 30 спецыялістаў публічных і навуковых бібліятэк, бібліятэк устаноў вышэйшай і сярэдняй спецыяльнай адукацыі, інфармацыйных цэнтраў нашай краіны.
Віртуальная чытальная зала запрашае да супрацоўніцтва ўсе зацікаўленыя арганізацыі нашай краіны па пытаннях падпіскі на ліцэнзійныя базы даных і навучання працы з імі.
Матэрыял пададзены аддзелам карпаратыўнага ўзаемадзеяння.
