Падводзім вынікі I этапу рэспубліканскага творчага конкурсу “Кніга з экрана”, прысвечанага 75-й гадавіне Перамогі савецкага народа ў Вялікай Айчыннай вайне.
Конкурс буктрэйлераў у сценах бібліятэкі абмяркоўвалі яшчэ ў канцы мінулага года. На сустрэчы дырэктара Нацыянальнай бібліятэкі Беларусі Рамана Матульскага з фіналістамі конкурсу “Студэнт года” пра буктрэйлеры гаварыў намеснік міністра інфармацыі Рэспублікі Беларусь Ігар Бузоўскі. Тады стала ясна: конкурс варта чакаць у бліжэйшы час.
І сапраўды, праект стартаваў ужо 27 студзеня гэтага года. Яго тэмай стала 75-я гадавіна Перамогі савецкага народа ў Вялікай Айчыннай вайне. Яго галоўныя мэты – папулярызацыя чытання сярод маладых людзей і іх далучэнне да захавання памяці аб Вялікай Айчыннай вайне, вайсковым і працоўным подзвігу беларускага народа.
Прадстаўнікі вучнёўскай, студэнцкай і працоўнай моладзі краіны даслалі 360 відэаработ. Адборам лепшых займалася каманда журы, у якую ўвайшлі прадстаўнікі Беларускага рэспубліканскага саюза моладзі, Міністэрства інфармацыі, Нацыянальнай бібліятэкі Беларусі і Саюза пісьменнікаў.
На партале Нацыянальнай бібліятэкі ўжо публікавалася інфармацыя пра цікавыя працы і літаратурныя творы, па якіх зняты відэаролікі. На перамогу прэтэндавала 91 праца – гэта значная колькасць матэрыялу, прычым журы трэба было зрабіць выбар у некалькіх катэгорыях.
У конкурсе перамаглі буктрэйлеры:
– Данілы Якаўлева (Гродзенскі дзяржаўны электратэхнічны калледж імя Івана Шчаснага) паводле аповесці Аляксея Карпюка “Франтавы дзённік”;
– Максіма Рэпкіна (РУП “Гроднаэнерга “Лідскія электрычныя сеткі”) паводле аповесці Барыса Васільева “А зори здесь тихие...” (мы пра яго пісалі раней);
– Антона Салаўя (Беларуска-Расійскі ўніверсітэт) па творы Барыса Васільева “Встречный бой”;
– Дзеравягіна Рамана, Чхала Анастасіі (гімназія №21 г. Мінска) па кнізе “Острова памяти” (аўтарскі калектыў: В. Баршчэўскі, Л. Ачыновіч, А. Суднік, А. Стаскевіч).
Матэрыял падрыхтаваны аддзелам суправаджэння інтэрнэт-партала.
