Віртуальны праект “На хвалі часу, у плыні жыцця” папоўніўся новымі матэрыяламі, створанымі нашымі калегамі з бібліятэк Беларусі ў гонар сваіх землякоў, пісьменнікаў-маладнякоўцаў.
Навінкі былі ўручаны Нацыянальнай бібліятэцы Беларусі падчас навукова-практычнага семінара “Ураджэнцы роднага краю”, які прайшоў 3 лютага і быў прысвечаны ўшанаванню памяці сяброў літаб’яднання “Маладняк” на іх малой радзіме.
У ініцыятывах, арганізаваных у рамках праекта “На хвалі часу, у плыні жыцця”, ужо не першы раз прымае ўдзел Пастаўская раённая дзіцячая бібліятэка імя У. Дубоўкі. У сакавіку 2021 г. на ўрачыстым мерапрыемстве ўзнагароджання пераможцаў Рэспубліканскага анлайн-конкурсу чытальнікаў “О, Беларусь, мая шыпшына” нам была перададзена міні-энцыклапедыя “Уладзімір Дубоўка” (2020), падрыхтаваная Пастаўскай бібліятэкай да 120-годдзя з дня нараджэння пісьменніка.
Інтэрактыўная карта – новае выданне, якое атрымала Нацыянальная бібліятэка ў дар ад пастаўчан. Яна змяшчае інфармацыю пра жыццёвы і творчы шлях Уладзіміра Дубоўкі, яго фотаздымкі, падрабязны матэрыял пра мерапрыемствы, што ладзіліся на Пастаўшчыне ў гонар пісьменніка з 2000 г. Карта змяшчае шмат QR-кодаў, якія дазваляюць паглядзець пазнавальныя відэаролікі, літаратурна-музычныя спектаклі, фільм пра У. Дубоўку “У песнях я на Беларусь малюся”, зняты бібліятэкай у 2015 г., буктрэйлер па кнізе пісьменніка “Як Алік у тайзе заблудзіўся” і інш.
Інтэрактыўная карта, прысвечаная У. Дубоўку
Пазнавальным матэрыялам пра свой край падзяліліся супрацоўнікі Цімкавіцкай сельскай бібліятэкі: яны стварылі і перадалі нам буклет-даведнік па малой радзіме Кузьмы Чорнага – вёсцы Цімкавічы, што на Капыльшчыне. З выдання можна даведацца пра гісторыю гэтага краю, цімкавіцкія вуліцы, архітэктурныя будынкі і мемарыялы, а таксама пра Літаратурны музей Кузьмы Чорнага.
Запрашаем пазнаёміцца з навінкамі ў віртуальных экспазіцыях праекта “На хвалі часу, у плыні жыцця”.
Сачыце за нашымі далейшымі навінамі!
Матэрыял пададзены інфармацыйна-аналітычным аддзелам.
