З 20 лістапада ў Нацыянальнай бібліятэцы Беларусі (3-ці паверх, кальцавы калідор) арганізавана выстаўка-прагляд “Калядны настрой”.
Па ўсім свеце напярэдадні вялікіх святаў паштальёны разносяць па адрасах велізарную колькасць віншавальных паштовак. Кожная з іх адлюстроўвае індывідуальнасць яе адпраўніка і разам з тым з’яўляецца сведчаннем свайго часу. Гэтак жа як газеты і часопісы, яны нясуць на сабе адбітак імгненнасці і таму застаюцца важнай крыніцай для ацэнкі ўспрымання таго або іншага свята ў даўно мінулыя гады.
Першая калядная паштоўка была адпраўлена ў Англіі ў 1794 годзе. Яе намаляваў мастак Добсан – сямейная сцэнка вакол елкі на фоне зімовага пейзажу – і паслаў у правінцыю ў якасці віншавання. У наступны год Добсан зрабіў літаграфіі некалькіх падобных картак і разаслаў усім сваім сябрам у выглядзе каляднага падарунка. Пазней, праз пяць гадоў, знайшоўся прадпрымальнік, які вырашыў выпусціць іх у продаж.
У 1843 годзе ў Германіі выйшла першая паштоўка з навагоднім віншаваннем. З гэтага часу пачалі выдавацца віншавальныя карткі самых разнастайных памераў.
Толькі з 16 снежня 1894 года Міністэрства ўнутраных спраў Расіі дазволіла выданне адкрытых лістоў прыватным выдавецтвам, да гэтага часу выдавецкія правы заставаліся за дзяржаўным Паштовым ведамствам.
На выстаўцы прадстаўлена каля 50 паштовак, якія выйшлі з друку ў Расіі, Германіі, Польшчы, Чэхіі, Венгрыі, Славакіі, Эстоніі, Літве і Беларусі ў перыяд 1900–1980-х гадоў. Асаблівую цікавасць уяўляе калекцыя рускіх і нямецкіх віншавальных картак пачатку XX стагоддзя. Матэрыял размешчаны ў храналагічным парадку.
Кантактны тэлефон: (8 017) 293 28 86.