З 27 красавіка па 27 ліпеня ў зале нотных і аўдыявізуальных дакументаў (пам. 305) праходзіць юбілейная выстава "Мелодыі белых начэй", прысвечаная 100-годдзю з дня нараджэння расійскага кампазітара Ісаака Іосіфавіча Шварца (1923–2009).
Народны артыст Расіі Ісаак Шварц пакінуў вялікую творчую спадчыну: музыку да 35 спектакляў, балеты, сімфанічныя і камерныя сачыненні, канцэрт для аркестра “Жоўтыя зоркі”. Аднак найбольшую вядомасць яму прынесла праца ў кіно. Ісаак Іосіфавіч напісаў музыку больш чым да 120 фільмаў, сярод якіх ёсць прызнаныя шэдэўры рускага і сусветнага кінематографа: “Зорка чароўнага шчасця”, “Мелодыі белай ночы”, “Белае сонца пустыні”, “Дэрсу Узала”, “Сто дзён пасля дзяцінства”, “Саламяны капялюшык”, “Жэня, Жэнечка і «кацюша»”, “Дзікі сабака Дынга”.
Асаблівую ролю ў жыцці кампазітара адыгралі сяброўства і плённае супрацоўніцтва з паэтам Булатам Акуджавам, на вершы якога ён напісаў 32 песні. Акуджава высока цаніў выключны дар Шварца “здабываць музыку з самога верша, тую самую, адзіную, якая толькі і існуе для кожнага радка”.
Шварц быў свайго роду музычным драматургам, валодаў унікальным дарам канструявання сюжэту з дапамогай музыкі. Сваімі кампазіцыямі ён не ілюстраваў падзеі на экране, а лірычна іх асэнсоўваў, ствараў характары, напаўняючы жыццё герояў фільма адчуваннямі і пачуццямі. Уся музыка кампазітара – тэатральная і кінематаграфічная, сімфанічная і балетная – размяшчаецца на тонкай грані паміж прастатой і ўзнёсласцю, паміж штодзённасцю і пранізлівай высакароднасцю. Яго творы адрозніваюцца яркім тэматызмам, эмацыянальнасцю, падкупляючай непасрэднасцю і даступнасцю ўспрымання.
На выставе прадстаўлены нотныя выданні твораў Ісаака Шварца, сярод якіх песні з кінафільмаў, а таксама сачыненні для сімфанічнага аркестра: сімфонія, Маладзёжная ўверцюра, сюіта з балета “Напярэдадні”. Аўдыядакументы даюць магчымасць праслухаць інструментальныя і вакальныя творы з розных кінафільмаў: “Прогулка по ночному городу” з фільма “Мелодыі белай ночы”, “Любовь и разлука” і “Песенка кавалергарда” на вершы Б. Акуджавы, “Я ехал к Вам” і “Не спрашивай, зачем…” на вершы А. Пушкіна і іншыя.
Дапаўняе выставу кніга В. Завадоўскай “Беседы с Исааком Шварцем”, а таксама артыкулы з перыядычных выданняў пра жыццё і творчасць кампазітара.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 27 52.
Матэрыял пададзены аддзелам абслугоўвання спецыялізаванымі фондамі.