З 6 жніўня па 10 верасня ў аддзеле абслугоўвання афіцыйнымі дакументамі (пам. 207) арганізавана выстаўка “Моладзь XXI стагоддзя”, прысвечаная Міжнароднаму дню моладзі.
Гэты Дзень быў заснаваны Генеральнай Асамблеяй ААН 17 снежня 1999 г. (рэзалюцыя 54/120) і штогод адзначаецца 12 жніўня, пачынаючы з 2000 г. Свята было абвешчана па прапанове Сусветнай канферэнцыі міністраў па справах моладзі, якая адбылася ў Лісабоне ў жніўні 1998 года.
Міжнародны дзень моладзі – гэта добрая магчымасць яшчэ раз звярнуць увагу сусветнай супольнасці на праблемы і задачы, што стаяць перад моладдзю, вітаць яе дасягненні і садзейнічаць яе ўдзелу ва ўсіх сферах жыцця грамадства.
Па класіфікацыі ААН, узрост тых, хто адносіцца да моладзі, складае ад 15 да 24 гадоў. Сёння – гэта 1,2 млрд чалавек, гэта значыць 18 % сусветнага насельніцтва. Маладое пакаленне ва ўсіх краінах з’яўляецца рэзервам для развіцця, станоўчых сацыяльных змен і тэхналагічных інавацый. Ідэалы, энергічнасць і шырата поглядаў моладзі адыгрываюць цэнтральную ролю ў працэсе пастаяннага развіцця грамадства. Аднак на сённяшні дзень моладзь сутыкаецца з мноствам праблем, звязаных з пошукам годнай працы і яе аплаты, пошукам жылля, забеспячэннем паўсядзённых патрэб, клопатам пра здароўе. Таму вельмі важна прыцягваць увагу грамадства да праблем моладзі для сумеснага пошуку эфектыўных рашэнняў на глабальным, рэгіянальным і нацыянальным узроўнях.
У 1995 г. ААН прыняла Сусветную праграму дзеянняў у інтарэсах моладзі на перыяд да 2000 г. і на наступны перыяд, якая на сённяшні момант з’яўляецца міжнароднай стратэгіяй рашэння праблем маладых людзей. У праграме пазначаны меры па ўзмацненні дзейнасці дзяржаў адносна маладога пакалення, а таксама крокі па паляпшэнні якасці і пашырэнні круга магчымасцей, даступных маладым людзям для непасрэднага, эфектыўнага і канструктыўнага ўдзелу ў жыцці грамадства. Праграма дзеянняў ахоплівае 15 напрамкаў: адукацыя, занятасць, голад і галеча, ахова здароўя, навакольнае асяроддзе, злоўжыванне наркатычнымі сродкамі, злачыннасць сярод непаўналетніх, арганізацыя вольнага часу, дзяўчаты і маладыя жанчыны, паўнапраўны і эфектыўны ўдзел моладзі ў жыцці грамадства і ў працэсе прыняцця рашэнняў, глабалізацыя, інфармацыйна-камунікацыйныя тэхналогіі, ВІЧ/СНІД, узброеныя канфлікты, пытанні адносін паміж пакаленнямі.
У Рэспубліцы Беларусь узроставая мяжа моладзі вызначана ад 16 да 30 гадоў. Дзяржаўная маладзёжная палітыка з’яўляецца прыярытэтным напрамкам сацыяльнай і эканамічнай палітыкі нашай краіны. Рэгулярна кожныя тры гады прымаецца спецыяльная дзяржаўная праграма "Моладзь Беларусі". У краіне функцыянуюць маладзёжныя грамадскія аб’яднанні, у ліку якіх – Беларускі рэспубліканскі саюз моладзі, Беларуская рэспубліканская піянерская арганізацыя, Беларуская асацыяцыя клубаў ЮНЕСКА, Ліга добраахвотнай працы моладзі, Беларуская рэспубліканская скауцкая асацыяцыя і інш.
Выстаўка змяшчае наступныя тэматычныя раздзелы:
- Моладзь у сучасным свеце.
- Міжнародныя прававыя дакументы і праграмы, якія датычацца моладзі.
- Адукацыя моладзі.
- Моладзь і рынак працы.
- Здароўе моладзі.
- Дзяржаўная маладзёжная палітыка Рэспублікі Беларусь.
Экспазіцыя будзе цікавай выкладчыкам, навуковым работнікам, аспірантам, студэнтам, а таксама ўсім, хто цікавіцца пытаннямі маладзёжнай палітыкі ў нашай краіне і свеце.
Карысныя спасылкі
- Пасяджэнне Генеральнай Асамблеі высокага ўзроўню па пытаннях аб моладзі (25–26 ліпеня 2011 года)
- Дзейнасць ААН
- Моладзь і наркотыкы
- Міжнародны дзень моладзі
- Міжнародны год моладзі
Міжнародная арганізацыя працы
Харчовая і сельскагаспадарчая арганізацыя ААН
Праграма ААН па міжнародным кантролі над наркотыкамі (ЮНДКП)
Фонд ААН па народанасельніцтве
ЮНЕСКА
ЮНІСЕФ
Дакументы
- Рэзалюцыя 54/120 Генеральнай Асамблеі аб абвяшчэнні Дня (1999 год)
- Лісабонская дэкларацыя па пытаннях маладзёжнай палітыкі і праграмах (1998 год)
- Сусветная праграма дзеянняў у інтарэсах моладзі на перыяд да 2000 г. і на наступны перыяд (1995 год) і дапаўненне да яе (2007 год)
- Парадак дня на XXI стагоддзе
- Правілы ААН, якія датычацца абароны непаўналетніх, пазбаўленых свабоды (1990 год)
- Мінімальныя стандартныя правілы ААН, якія датычацца выканання правасуддзя адносна непаўналетніх ("Пекінскія правілы") (1985 год)
- Дэкларацыя аб распаўсюджванні сярод моладзі ідэалаў міру, узаемнай павагі і ўзаемаразумення паміж народамі (1965 год)