З 1 па 29 лютага 2008 г. у зале беларускай літаратуры (пам. 205) праходзіць кніжная выстаўка «Па абавязку сэрца і сумлення», прысвечаная 100-годдзю з дня нараджэння Станіслава Пятровіча Шушкевіча, беларускага паэта, заслужанага работніка культуры Беларусі.
У шматграннай пісьменніцкай дзейнасці Станіслава Пятровіча Шушкевіча надзвычай важнай галіной была творчасць для дзяцей. Ён адносіцца да тых аўтараў, што пісалі для дзяцей не ад выпадку да выпадку, а няспынна, з дня ў дзень, аддаючы дзецям і багаты жыццёвы вопыт, і натхненне, і талент. Яго творы для юных чытачоў прасякнуты пафасам высокай грамадзянскасці, актыўна садзейнічаюць далучэнню дзяцей да свету цудоўнага, узвышаюць іх духоўна.
Экспазіцыя складаецца з 5-ці раздзелаў. У 4-х першых прадстаўлена літаратурная спадчына пісьменніка, апошні раздзел знаёміць з кнігамі і артыкуламі, прысвечанымі С. Шушкевічу.
«Свет даверу і мудрасці» – так называецца першы раздзел экспазіцыі, што змяшчае творы аўтара, напісаныя ім для дзяцей і дарослых. Яны былі выдадзены як асобнымі кнігамі, так і ўключаны ў паэтычныя і празаічныя зборнікі пісьменніка. У экспазіцыі прадстаўлены таксама творы, якія былі надрукаваны ў калектыўных зборніках і перыядычных выданнях. Адметнае месца ў экспазіцыі займаюць збор твораў у 2-х тамах (1978) і зборнік вершаў «Выбранае» (1988). Сярод экспанатаў выстаўкі – першая кніга паэзіі С. Шушкевіча «Вершы», якая выйшла ў 1934 годзе, кнігі з аўтографамі.
Другі раздзел экспазіцыі «Чароўная магія слова» знаёміць з перакладамі Станіслава Шушкевіча твораў іншых аўтараў. Наведвальнікі выстаўкі маюць магчымасць убачыць пераклады з рускай, малдаўскай, літоўскай, латышскай і іншых моў свету.
Аб тым што многія творы пісьменніка перакладзены на рускую і ўкраінскую мовы, сведчаць экспанаты, прадстаўленыя ў 3-ім раздзеле экспазіцыі – «Паэт радасці».
Асобным раздзелам – «Мовай пачуццяў» – на выстаўцы прадстаўлены творы паэта, пакладзеныя на музыку. Да меладычнай паэзіі С. Шушкевіча звярталіся кампазітары Ю. Семяняка, Я. Цікоцкі, Л. Панько, З. Яўтуховіч, С. Бельцюкоў, А. Рэмізоўская і іншыя.
Публікацыі апошнягя раздзела – «Душэўная шчырасць» – апавядаюць пра творчы і жыццёвы лёс юбіляра.
Кантактны тэл. 293-27-16