З 15 чэрвеня па 19 ліпеня ў зале дакументаў міжнародных арганізацый (пам. 207g) адкрыта тэматычная выстава “Праблема бежанцаў у сучасным свеце”, прысвечаная Сусветнаму дню бежанцаў.
У экспазіцыі каля 100 дакументаў на рускай, англійскай і нямецкай мовах. Гэта кнігі, брашуры, мімеаграфаваныя матэрыялы ААН, перыядычныя выданні, буклеты.
Дакументы пазнаёмяць чытача з дзейнасцю міжнародных, няўрадавых і праваабарончых арганізацый, накіраванай на забеспячэнне абароны бежанцаў, іх адаптацыю і інтэграцыю ў краінах, якія далі прытулак. Матэрыялы выставы знаёмяць са становішчам бежанцаў у свеце, з дзейнасцю Упраўлення Вярхоўнага камісара ААН па справах бежанцаў (УВКБ), а таксама з унутранай і знешняй палітыкай Рэспублікі Беларусь, накіраванай на аказанне дапамогі бежанцам у іх пошуку бяспечнага жыцця, міру і стабільнасці.
Большую частку экспазіцыі складаюць дакументы міжнародных арганізацый – даклады ААН, такія як даклад Вярхоўнага камісара Арганізацыі Аб’яднаных Нацый па справах бежанцаў, даклад ААН аб становішчы бежанцаў у свеце, матэрыялы семінараў Упраўлення Вярхоўнага камісара ААН па справах бежанцаў і Еўрапейскага савета па справах бежанцаў.
Сярод дакументаў, прадстаўленых на выставе, – зборнікі міжнародна-прававых дакументаў і нацыянальных заканадаўчых актаў па пытаннях бежанцаў, манаграфіі, матэрыялы даследаванняў па вымушанай міграцыі і пытаннях атрымання статусу бежанца, практычныя і навучальныя дапаможнікі, матэрыялы навукова-практычных канферэнцый.
Экспазіцыя ўключае наступныя тэматычныя раздзелы:
- Становішча бежанцаў у свеце
- Бежанцы ў сучасным міжнародным праве
- Роля УВКБ ААН у абароне праў бежанцаў
- Міжнароднае супрацоўніцтва і палітыка дапамогі бежанцам
- Сістэма абароны бежанцаў у Рэспубліцы Беларусь
Выстава прызначана для палітолагаў, юрыстаў, сацыёлагаў, супрацоўнікаў органаў заканадаўчай і выканаўчай улады, навучальных і навуковых структур, а таксама ўсіх, хто цікавіцца праблемамі бежанцаў і пытаннямі міграцыі і прытулку.
Сусветны дзень бежанцаў дзень быў заснаваны Генеральнай асамблеяй ААН 4 снежня 2000 года (рэзалюцыя 55/76) і штогод адзначаецца 20 чэрвеня, пачынаючы з 2001 года.
На сённяшні дзень, па даных ААН, 82.4 млн чалавек па ўсім свеце пакінулі свае дамы – гэта самыя высокія паказчыкі вымушанай міграцыі ў гісторыі. Кожную хвіліну 24 чалавекі пакідаюць родныя мясціны праз войны, пераслед або страх за сваё жыццё.
Міжнародная супольнасць накіроўвае свае намаганні на палягчэнне цяжкай долі гэтых людзей. Генеральная асамблея ААН у 1950 годзе заснавала Упраўленне Вярхоўнага камісара ААН па справах бежанцаў (УВКБ), якое працуе ў больш чым 110 краінах свету і аказвае прававую абарону і дапамогу мільёнам бежанцаў: асобам, якія вяртаюцца, перамешчаным ўнутры краіны асобам і асобам без грамадзянства.
Наша краіна ўносіць свой уклад у міжнародныя намаганні па рашэнні праблем бежанцаў. Прадстаўніцтва УВКБ ААН у Беларусі было адкрыта ў 1995 годзе. Асноўную ўвагу яно надае садзейнічанню органам дзяржаўнага кіравання ва ўдасканаленні заканадаўства ў сферы міграцыі і бежанцаў, павышэнню кваліфікацыі кадраў, забеспячэнню прававой і сацыяльнай абароны бежанцаў, садзейнічае наладжванню супрацоўніцтва паміж дзяржаўнымі органамі і грамадскімі аб’яднаннямі па пытаннях, звязаных са становішчам бежанцаў.
Карысныя спасылкі
- Упраўленне Вярхоўнага камісара па справах бежанцаў (УВКБ)
- Прадстаўніцтва УВКБ ААН у Беларусі
- Прадстаўніцтва УВКБ ААН у Расіі
- Упраўленне ААН па каардынацыі гуманітарных пытанняў (УКГП)
- Упраўленне Вярхоўнага камісара па правах чалавека
- Сусветная харчовая праграма (СХП)
- Блізкаўсходняе агенцтва ААН для дапамогі палесцінскім бежанцам і арганізацыі работ (БАДАР)
- Міжнародная арганізацыя па міграцыі
Дакументы
- Рэзалюцыя (A/RES/55/76) Генеральнай асамблеі аб абвяшчэнні Дня
- Канвенцыя аб статусе бежанцаў (1951)
- Пратакол да Канвенцыі аб статусе бежанцаў (1967)
Час работы выставы адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 27 26.
Матэрыял пададзены аддзелам абслугоўвання афіцыйнымі дакументамі.