З 6 па 28 сакавіка ў зале дакументаў па мастацтве (пам. 306) праходзіць выстаўка “Праметэй Адраджэння”, прысвечаная 540-годдзю з дня нараджэння Мікеланджэла Буанароці (1475–1564).
Геній Мікеланджэла – універсальны. Мастак быў тытанам па складзе асобы і бязмежнай моцы творчай фантазіі, а шматграннасць яго дару выявілася ў жывапісе, архітэктуры, паэзіі, але найперш – у скульптуры. Унікаючы ў форму, утоеную ў коснай матэрыі, ён “вызваляў” яе з нябыту, адсякаючы ад мармуровай глыбы “ўсё лішняе”.
Творчасць майстра, сталае бліскучым заключным этапам італьянскага Адраджэння, сыграла велізарную ролю ў развіцці еўрапейскага мастацтва, шмат у чым падрыхтавала станаўленне маньерызму, аказала вялікі ўплыў на фарміраванне прынцыпаў барока. Яго тварэнні – фрэскавыя размалёўкі Сіксцінскай капэлы ў Ватыкане, статуі Давыда і Майсея, сабор Святога Пятра ў Рыме – з'яўляюцца велізарным здабыткам усяго чалавецтва.
На кніжна-ілюстрацыйнай выстаўцы прадстаўлены як айчынныя, так і замежныя выданні. Сярод экспанатаў – альбомы і кнігі, рэпрадукцыі і камплекты паштовак з работамі мастака, паэтычныя творы Мікеланджэла, а таксама часопісныя публікацыі і іншы матэрыял, што дазваляе ў поўнай меры азнаёміцца з творчасцю вялікага майстра.
У экспазіцыі прадстаўлена звыш 70 дакументаў.
Выстаўка разлічана на ўсе катэгорыі чытачоў, якія цікавяцца мастацтвам італьянскага Адраджэння і творчасцю Мікеланджэла Буанароці.
Кантактны тэлефон: (8 017) 293 27 53.