З 19 верасня па 9 кастрычніка ў зале дакументаў міжнародных арганізацый (пам. 207g) ладзіцца тэматычная кніжная выстаўка “Турызм у эпоху глабалізацыі – свет, адкрыты для ўсіх”, прысвечаная Сусветнаму дню турызму.
Гэты Дзень быў заснаваны на трэцяй сесіі Генеральнай асамблеі Сусветнай турысцкай арганізацыі (СТА) у верасні 1979 года і штогод адзначаецца 27 верасня, пачынаючы з 1980 года. Дата была абрана не выпадкова – 27 верасня 1970 года быў прыняты Статут СТА.
Мэта свята – прапаганда турызму, асвятленне яго ўкладу ў эканоміку сусветнага супольніцтва, у развіццё культурных сувязей і забеспячэнне ўзаемаразумення паміж народамі.
Міжнародны турызм аказвае моцнае ўздзеянне на эканамічнае развіццё і занятасць насельніцтва многіх краін. Па ацэнках спецыялістаў СТА, у 2010 годзе кожны восьмы працаздольны чалавек у свеце быў заняты ў гэтым сектары эканомікі. У некаторых краінах, турызм з’яўляецца асноўнай крыніцай прыбытку дзяржавы.
Акрамя ўплыву на эканоміку многіх краін, міжнародны турызм уздзейнічае на іх сацыяльнае і культурнае асяроддзе. Дзякуючы развіццю турызму ўмацоўваюцца культурныя сувязі, забяспечваецца ўзаемаразуменне і спазнанне традыцый і асноў народаў іншых краін. У 2010 годзе 940 мільёнаў турыстаў перасеклі міжнародныя межы. Знаёмства з рознымі ўкладамі жыцця, цікавымі і незвычайнымі традыцыямі, наведванне гісторыка-культурных аб’ектаў становяцца галоўнымі заахвочвальнымі матывамі для вандраванняў, якія збліжаюць мільёны людзей.
Турызм дорыць людзям добры настрой, умацоўвае здароўе, прыносіць станоўчыя эмоцыі, таму Сусветны дзень турызму ўрачыста адзначаюць у большасці краін. Гэта свята кожнага, хто хоць раз адчуў сябе вандроўцам, выбраўшыся са звыклай будзённай мітусні. Пры гэтым усё роўна куды: на мора, у горы, у лес, на бераг рэчкі або ў іншыя маляўнічыя месцы, на якія багатая наша планета.
У той жа час гэта прафесійнае свята тых, хто непасрэдна заняты ў сферы турыстычнага бізнесу і забяспечвае камфортны і бяспечны адпачынак. У гэты дзень праходзяць злёты турыстаў, святочныя мерапрыемствы і фестывалі, прысвечаныя турызму і турыстычнаму бізнесу.
Штогод Сусветная турысцкая арганізацыя абвяшчае тэму свята. Сусветны дзень турызму – 2011 праводзіцца пад дэвізам "Турызм аб’ядноўвае культуры" і накіраваны на тое, каб вылучыць ролю турызму ў знішчэнні бар’ераў паміж культурамі і стварэнні атмасферы памяркоўнасці, павагі і ўзаемнага разумення. У нашым часцяком раз’яднаным свеце гэтыя каштоўнасці ўяўляюць сабой прыступкі на шляху пераходу да больш мірнай і стабільнай будучыні.
На выстаўцы прадстаўлена больш за 60 дакументаў: кнігі, брашуры, перыядычныя выданні, мімеаграфаваныя матэрыялы. Вялікую частку экспазіцыі складаюць дакументы міжнародных арганізацый (ААН, СТА, ЮНЕСКА, Еўрапейскага cаюза, Савета Еўропы) на рускай, французскай і англійскай мовах.
Выстаўка ўключае наступныя тэматычныя раздзелы:
- Прававое забеспячэнне міжнароднага турызму – міжнародныя рэкамендацыі і стандарты, нарматыўна-прававыя акты.
- Міжнародны турызм і ўстойлівае развіццё: роля і значэнне турызму ў эканамічным і сацыяльным развіцці краін і рэгіёнаў.
- Роля турызму ва ўмацаванні культурных сувязей, узаемапавагі і ўзаемаразумення паміж народамі.
- Эканоміка, арганізацыя міжнароднага турызму і кіраванне ім.
- Геаграфія міжнароднага турызму.
- Развіццё індустрыі турызму і турыстычнага бізнесу ў Рэспубліцы Беларусь.
Экспазіцыя будзе карысная спецыялістам у галіне турызму, арганізатарам турысцкага бізнесу, студэнтам вышэйшых навучальных устаноў турыстычнага профілю, а таксама ўсім, хто цікавіцца міжнародным турызмам і любіць падарожнічаць.
Карысныя спасылкі:
- Сусветны дзень турызму (27 верасня)
- Сусветны дзень туризму – 2011
- Сусветная турысцкая арганізацыя (СТА)
- Устойлівае развіццё турызму
- Міністэрства спорту і турызму Рэспублікі Беларусь
- Рэспубліканскі саюз турыстычных арганізацый
- III International Conference on Tourism and Handcrafts
Дакументы
- Рэзалюцыі Генеральнай Асамблеі
- Рэзалюцыі ЭКАСАС
- Даклады Генеральнага сакратара
- Пагадненне паміж Арганізацыяй Аб’яднаных Нацый і Сусветнай турысцкай арганізацыяй
- Статут Сусветнай турысцкай арганізацыі