2 сакавіка ў галерэі “Лабірынт” (3-ці паверх) адкрылася выстаўка “Імгненні жыцця” вядомага беларускага мастака-авангардыста Уладзіміра Акулава.
Уладзімір Акулаў нарадзіўся ў 1954 г. у Баранавічах у сям’і мастака-афарміцеля. Займаўся ў студыі выяўленчага мастацтва слуцкага гарадскога Дома піянераў і школьнікаў. Яго творчы стыль і характар як мастака-прафесіянала пачаў фарміравацца падчас вучобы ў Віцебскім педінстытуце на мастацка-графічным факультэце пад уплывам работ Казіміра Малевіча, Марка Шагала, Веры Ермалаевай, Эля Лісіцкага. Сёння У. Акулаў з’яўляецца адным з самых вядомых і яркіх прадстаўнікоў беларускага авангарда. Галоўнае ў творчасці мастака – захаваць традыцыі і дух авангарда 1990-х гг.
Выстаўка “Імгненні жыцця” прыемна здзіўляе сваёй разнастайнасцю. Работы аб’ядноўваюцца ў маштабныя тэматычныя цыклы – “Маскі і вобразы”, “Вайна”, “Вялікія людзі”, “Анімалістычны цыкл”, “Футбалісты” і інш. Так шырока і нестандартна бачыць свет мастак-авангардыст.
У мерапрыемстве прынялі ўдзел намеснік дырэктара Нацыянальнай бібліятэкі Алесь Суша і куратар выстаўкі Яўген Ксяневіч.
Яўген Ксяневіч адзначыў, што асабліва прыемна бачыць на вернісажы моладзь, якая цікавіцца творчасцю мастака. Дарэчы, нядаўна выстаўка Акулава праходзіла ў мастацкай галерэі “Універсітэт культуры” ў Палацы Рэспублікі і карысталася вялікай папулярнасцю.
Адкрыццё выстаўкі ў Нацыянальнай бібліятэцы сабрала не толькі яе наведвальнікаў, але і знатакоў мастацтва Уладзіміра Акулава, а таксама калекцыянераў яго работ. Андрэй Плясанаў і Аляксандр Іваноў даўно сочаць за творчасцю мастака і з кожнай наступнай выстаўкай адкрываюць для сябе штосьці новае, перажываюць свежыя эмоцыі і ўражанні, папаўняюць свае прыватныя калекцыі. Да прыкладу, у калекцыі Андрэя ні многа ні мала – 50 работ Акулава! І гэта не мяжа. Яўген Ксяневіч перакананы, што Уладзіміра Акулава можна смела паставіць у адзін шэраг з Маркам Шагалам і Казімірам Малевічам. Яго творчасць ужо ацанілі шматлікія замежныя калекцыянеры – у Германіі, Бельгіі, Польшчы, Італіі і інш. краінах. Несумненна – гэта поспех! Поспех, у якога ёсць працяг…
Наведаць выстаўку і пранікнуць у свет мастака-авангардыста можна да 1 мая 2017 года.
Дата заканчэння выстаўкі можа быць зменена.
Удакладняйце інфармацыю па тэлефоне: (8 017) 266 37 37.
 |
 |
 |
 |
 |
 |
 |
|
 |
