27 лістапада ў галерэі “Панарама” (22-гі паверх) адбылося ўрачыстае адкрыццё выстаўкі акварэляў Уладзіміра Рынкевіча “Нізка пачуццяў”.
У экспазіцыі прадстаўлены 30 акварэляў мастака, якія можна назваць творчымі пошукамі двух апошніх гадоў. Большасць твораў яшчэ ні разу не пакідала майстэрню. Мастак прапануе гледачам увайсці ў сааўтарства з ім, далучыцца да віртуальнага стварэння вобразных кампазіцый, атрымаць радасць у пачуццёвым адчуванні колеравай гармоніі, пошуках дынамічных лінейна-пластычных рухаў, непаўторных фактур.
Пад час урачыстага адкрыцця намеснік дырэктара Нацыянальнай бібліятэкі Беларусі Таццяна Кузьмініч распавяла пра шматлікія творчыя праекты, у якіх прымаў удзел Уладзімір Рынкевіч, падкрэсліла, што заўсёды творы мастака выклікалі цікаўнасць, адрозніваліся асобым аўтарскім стылем і каларытам.
“Жанр акварэлі вельмі складаны і патрабуе паглыбленага аналізу. У працах Уладзіміра Рынкевіча дамінуе паэтычны пачатак і колеры святла. Ён не проста мастак, а майстар” – адзначыў літаратуразнаўца, пісьменнік Алесь Бельскі.
Сваімі думкамі пра выстаўку падзяліўся доктар мастацтвазнаўства, прафесар Рыгор Шаура, звярнуўшы ўвагу на асаблівасці тэхнікі мастака і яго ўклад у мастацтва.
Напрыканцы ўрачыстасці Уладзімір Рынкевіч падзякаваў за ўвагу да выстаўкі і запрасіў усіх прысутных азнаёміцца з экспазіцыяй.
Уваход на выстаўку платны (складае кошт наведвання агляднай пляцоўкі).
Тэлефоны для даведак: (8 017) 293 27 56, 293 78 33.
Е-mail: pr@nlb.by