1 чэрвеня ў бібліятэцы адкрылася выстаўка дзіцячай графікі “Яе Вялікасць – Літара”, прысвечаная Міжнароднаму дню абароны дзяцей.
Напярэдадні гэтага добрага свята 22-гі паверх бібліятэкі ўпрыгожылі работы юных мастакоў арт-студыі з прамяністай назвай “Сонца”. Яна была заснавана ў 2000 годзе пры Мінскім дзяржаўным палацы дзяцей і моладзі. У 2011-м пераехала ў Расійскі цэнтр навукі і культуры ў Мінску, дзе па сённяшні дзень працуе пад кіраўніцтвам мастака, члена Беларускага саюза майстроў народнай творчасці Алы Кейге.
Штогод “Сонца” праводзіць мастацкія выстаўкі, прысвечаныя творчасці вядомых пісьменнікаў, важным гістарычным падзеям, святочным датам. Напрыклад, выстаўка ілюстрацый да казак Аляксандра Пушкіна і вершаў Агніі Барто, мастацкі праект па песнях, прысвечаных перамозе ў Вялікай Айчыннай вайне, выстаўка графікі “Лінія, штрых, пляма” і многія іншыя.
“Яе Вялікасць – Літара”, чарговая экспазіцыя арт-студыі “Сонца”, прадстаўляе ўвазе наведвальнікаў погляд юных мастакоў на літару праз казку, уважліва прачытаную, асэнсаваную і зразумелую.
У адкрыцці вернісажу прынялі ўдзел Алена Даўгаполава, першы намеснік дырэктара Нацыянальнай бібліятэкі Беларусі; Наталля Аўралёва, кансультант Прадстаўніцтва Рассупрацоўнітва ў Рэспубліцы Беларусь – Расійскага цэнтра навукі і культуры ў Мінску; Яўгенія Субоціна, галоўны спецыяліст Прадстаўніцтва Рассупрацоўнітва; Людміла Рыбакова, генеральны прадзюсар міжнароднай выстаўкі-конкурсу сучаснага мастацтва “Беларускі тыдзень мастацтва”, член Творчага саюза мастакоў Расіі, і, канечне, Ала Кейге, кіраўнік арт-студыі “Сонца”.
Запрашаем дзяцей і іх бацькоў наведаць выстаўку, каб у чарговы раз пераканацца: дзяцінства – лепшы час для чытання добрых казак і бязмежнай творчасці.
З Днём абароны дзяцей!
Пазнаёміцца з экспазіцыяй можна да 20 жніўня 2017 года.
Дата заканчэння работы выстаўкі можа быць зменена.
З 2 чэрвеня ўваход на выстаўку платны, адпавядае кошту наведвання агляднай пляцоўкі.
Тэлефоны для даведак: (8 017) 266 37 37, 293 28 33, 293 27 56.
Е-mail: pr@nlb.by
|
|
 |
|
 |
 |
 |
 |
 |
 |
 |
 |
 |
|
|
|
|
